ត្បិតតែរដូវកាលដំបូងរបស់ Jose Mourinho នៅ Old Trafford មិនទាន់បានល្អក៏ដោយ ប៉ុន្តែមានដំណឹងមកថាក្លឹបមួយនេះ មានបំណងចង់តកុងត្រាឱ្យអ្នកចាត់ការរូបនេះ រហូតដល់១០ឆ្នាំឯណោះ។

រយៈពេល៤ខែមកនេះ Mourinho ទទួលបានការពិន័យពីសហព័ន្ធបាល់ទាត់អង់គ្លេស រហូតដល់២ដងមកហើយ ចំពោះអប្បកិរិយារបស់គេនៅលើទីលាន។ យ៉ាងណាមិញ នៅខែធ្នូចុងឆ្នាំនេះ ក្រុមបិសាចក្រហមបានឈ្នះ៥ប្រកួតជាប់គ្នាហើយ ខណៈដែលទម្រង់លេងរបស់ Paul Pogba និង Zlatan Ibrahimovic កាន់តែល្អជាងមុនដែរ។ ដូច្នេះហើយបានជាក្លឹប Man Utd កំពុងតែពិចារណាក្នុងការបន្ដកុងត្រាឱ្យអ្នកចាត់ការរូបនេះបន្ដទៀតឬយ៉ាងណា ព្រោះ Jose បានបង្ហើបថារូបគេចុងបន្ដនៅ Old Trafford ទៀត។

អតីតអ្នកចាត់ការក្រុម Real Madrid រូបនេះ មានកុងត្រា៣ឆ្នាំ ក្នុងការមកដឹកនាំក្រុម Manchester United នេះ ក្រោយពីត្រូវក្លឹប Chelsea បណ្ដេញចេញ ដោយសារតែដឹកនាំក្រុមតោខៀវជោគជ័យឈ្នះពាន តែធ្លាក់ទម្រង់លេងនៅរដូវកាលបន្ទាប់ពីឈ្នះ។ ត្បិតតែត្រូវបណ្ដេញចេញមែន ប៉ុន្តែអ្នកចាត់ការរហស្សនាម special one មួយនេះ នៅតែមានភាពល្បីល្បាញដដែល៕