លោកRanko Popovic គ្រូបង្វឹករបស់ក្រុម Buriram United បាននិយាយថាការប្រកួតជាមួយក្រុម Lanexang United នៅពាន Toyota Mekong Cup នេះ គឺក្រុមរបស់លោកលេងតំណាងឱ្យបាល់ទាត់ថៃនិងអ្នកគាំទ្រថៃតែម្ដង។
Lanexang United នឹងត្រូវតតាំងជាមួយក្រុម Buriram United ជើងទី១នៅទឹកដីឡាវ វគ្គផ្ដាច់ព្រ័ត្រពានរង្វាន់ Toyota Mekong Cup 2016 ក្រោយពីក្រុមជើងឯកឡាវមួយនេះបានយកឈ្នះក្រុមបឹងកេតអង្គររបស់កម្ពុជានៅវគ្គពាក់កណ្ដាលផ្ដាច់ព្រ័ត្រដល់ទៅ ៣-០។ ខណៈដែលក្រោយពីចប់ការប្រកួតជើងទី១នេះទៅ បើទោះជាលទ្ធផលយ៉ាងណាក៏ដោយ ក៏ក្រុមទាំងពីរនេះនឹងត្រូវលេងជើងទី២ម្ដងទៀត នៅថ្ងៃទី៧ខែមករាខាងមុខនេះ នៅទឹកដីថៃវិញម្ដង។
មុនការប្រកួតជាមួយក្រុមម្ចាស់ផ្ទះចាប់ផ្ដើម លោកRanko Popovic គ្រូបង្វឹករបស់ក្រុម Buriram United បានបង្ហើបថា៖ “នេះជាការប្រកួតដំបូងរបស់យើង ត្រៀមលេងលីគកំពូលថៃ។ ខ្ញុំសូមអបអរនិងសរសើរដល់ក្រុម Lanexang ដែលទទួលជោគជ័យកន្លងមក ពួកគេជាក្រុមខ្លាំង។ ប៉ុន្តែយើងមកលេងនៅទីនេះ គឺតំណាងឱ្យបាល់ទាត់ថៃ អ្នកគាំទរថៃ និង Thai Premier League តែម្ដង។ យើងនឹងធ្វើឱ្យល្អបំផុតក្នុងការប្រកួតនេះ ដើម្បីបានលទ្ធផលល្អ”។
ការប្រកួតជើងទី១នៃវគ្គផ្ដាច់ព្រ័ត្រ Toyota Mekong Cup 2016 នេះនឹងត្រូវធ្វើឡើងនៅកីឡដ្ឋាន Chao Anouvong Stadium ទឹកដីរបស់ឡាវ នៅវេលាម៉ោង៦ល្ងាចថ្ងៃទី៤ខែមករាឆ្នាំ២០១៧៕
មតិយោបល់