Cristiano Ronaldo កំពុងតែត្រូវបានមិត្តរួមក្រុម Joao Mario ទាក់ទងបញ្ចុះបញ្ចូលឱ្យទៅលេងនៅក្លឹប Inter Milan របស់អ៊ីតាលី ក្រោមការគ្រប់គ្រងថ្មីរបស់មហាសេដ្ឋីចិន។
Inter Milan ក្រោយពីត្រូវបានអ្នកមាននៅចិនទិញយកមក កំពុងតែប្រមូលយកកីឡាករល្អៗត្រលប់ទៅលេងនៅអ៊ីតាលីវិញហើយ ដោយមានកុងត្រានិងតម្លៃពលកម្មគ្រាន់បើដែរ។ យ៉ាងណាមិញ អ្វីដែលកាន់តែភ្ញាក់ផ្អើលថែមទៀតនោះគឺកីឡាករម្នាក់របស់ក្រុមនេះ Mario កំពុងតែព្យាយាមទាក់ទង Ronaldo ឱ្យទៅលេងជាមួយគេថែមទៀតផង។
កីឡាករជម្រើសជាតិរបស់ព័រទុយហ្គាល់រូបនេះបាននិយាយដូច្នេះថា៖ “ខ្ញុំព្យាយាមបញ្ចុះបញ្ចូលឱ្យគាត់មកលេងនៅ Inter Milan ជាមួយខ្ញុំ ហើយវាជារឿងពិបាកបន្តិច។ គាត់មិនត្រឹមតែជាកីឡាករមិត្តរួមក្រុមនោះទេ គាត់ជាមនុស្សល្អ ហើយកើតមកជាអ្នកដឹកនាំ។ គាត់ជាមនុស្សខ្វាយខ្វល់ជាមួយអ្នកគ្រប់គ្នា”។
យ៉ាងណាមិញ ចំពោះរឿងផ្លាស់ចេញពី Real Madrid នេះដែរ Ronaldo បង្ហើបថាវាពិបាកណាស់សម្រាប់ការឆ្លើយចាកចេញពីអេស្ប៉ាញ ព្រោះរូបគេបានចាត់ទុកទីនេះជាផ្ទះរបស់ខ្លួនទៅហើយ ខណៈដែលកុងត្រាក៏នៅសល់ច្រើនទៀត៕
មតិយោបល់