Yuen Ting Chan ជាគ្រូបង្វឹករបស់ក្រុម Eastern SC ដែលបានក្លាយជាគ្រូបង្វឹកនារីដំបូងគេអាចរកពិន្ទុបានក្នុងការប្រកួតពានរង្វាន់ធំ AFC Champions League ក្រោយពីក្រុមរបស់នាងស្មើជាមួយ Kawasaki Frontale ១-១។
Chan បានដឹកនាំក្រុមខ្លាំងរបស់ហុងកុងមួយនេះចូលលេងវគ្គចែកពូលពាន AFC Champions League ដោយកាលពីសប្ដាហ៍មុននេះ បានចាញ់ក្រុម Guangzhou Evergrande ក្នុងលទ្ធផល ៧-០ ។ យ៉ាងណាមិញ ការប្រកួតយប់មិញនេះវិញ ពួកគេអាចធ្វើបានល្អឡើងវិញ ដោយរកបានពិន្ទុ១ពិន្ទុ ក្រោយពីស្មើជាមួយក្រុម Kawasaki ក្នុងលទ្ធផល ១-១ ។ ត្រឹមលទ្ធផល ទទួលបាន១ពិន្ទុ ឈ្មោះរបស់ Chan ត្រូវបានគេកត់សម្គាល់ហើយ ព្រោះអីតាំងពីដើមមកមិនមានគ្រូបង្វឹកស្ត្រីណាអាចរកពិន្ទុនៅពានលំដាប់ធំៗបាននោះទេ។
នារីវ័យ២៨ឆ្នាំខាងលើនេះ បានដឹកនាំក្រុម Eastern SC ឈ្នះពានលីគកំពូលរបស់ហុងកុង កាលពីរដូវកាលមុននេះ និងទទួលបានកៅអីមកលេងពាន AFC Champions League នេះ។ ខណៈដែលការលេង២ប្រកួតមកនេះ ស្មើ១និងចាញ់១ ហើយក្រុមដែលត្រូវជួបបន្ទាប់នោះគឺ Suwon Bluewings ហើយនាងក៏រំពឹងថានឹងអាចយកឈ្នះបានដែរ៕
មតិយោបល់