លោក Luis Enrique បានប្រកាសថានឹងចាកចេញពីតំណែងអ្នកចាត់ការក្រុម FC Barcelona នៅពេលចប់រដូវកាលនេះ ខណ:ដែលក្រុមខ្លាំងរបស់អេស្ប៉ាញមួយនេះក៏កំពុងតែស្វែងរកអ្នកជំនួសដែរ។
Barcelona បានប្រកាសរឿងដែលភ្ញាក់ផ្អើលមួយនេះ ក្រោយពីក្រុមយកឈ្នះលើ Sporting Gijon ក្នុងលទ្ធផល ៦-១ កាលពីយប់មិញនេះ។ ខណ:ដែលពេលចប់ការប្រកួតភ្លាម លោក Luis បានធ្វើការប្រកាសជាផ្លូវការតែម្ដងថាលោកនឹងចាកចេញពី Nou Camp នៅពេលចប់រដូវកាលនេះហើយ។ ការចាកចេញនេះដែរ គឺមានមូលហេតុថាអ្នកចាត់ការរូបនេះនឿយហត់ ហើយចង់មានពេលសម្រាកឱ្យបានគ្រប់គ្រាន់។
បុរសវ័យ៤៦ឆ្នាំខាងលើនេះបានចូលកាន់តំណែងកាលពីឆ្នាំ២០១៤កន្លងទៅ ហើយក៏បានជួយក្រុម Barcelona ឈ្នះពានដល់ទៅ៣ក្នុងមួយរដូវកាលដំបូង និងឈ្នះពាន២ទៀតកាលពីរដូវកាលមុនផងដែរ។ លោកគឺជាអតីតកីឡាកររបស់ក្រុមអ្នកមានបុណ្យ ដោយលេងបាន៨រដូវកាល ហើយទើបតែចូលនិវត្តន៍នៅឆ្នាំ២០០៤។ Luis ក្រោយពីចូលនិវត្តន៍ទៅ បានបង្វឹកក្រមយុវជនរបស់ barca ពី ឆ្នាំ២០០៨ដល់២០១១ មុនពេលទៅដឹកនាំក្រុម Roma និង Celta Vigo ហើយក៏មក Barcelona ធ្វើជាអ្នកចាត់ការតែម្ដង៕
មតិយោបល់