ក្រោយតាមដានជាយូរ និងបង្ហាត់ខ្សែប្រយុទ្ធឆ្នើម ចាន់ វឌ្ឍនាកា លើកដំបូងកាលពីម្សិលមិញ លោក Leonardo Vitorino បាននិយាយថា សមត្ថភាពនិងភាពឆ្លាតវ៉ៃរបស់កីឡាករក្លឹប Fujieda MYFC រូបនេះ អាចឈានទៅលេងលីគកំពូលជប៉ុន ( J1 League ) បាន។

គ្រូសញ្ជាតិប្រេហ្ស៊ីលបានលើកឡើងក្នុងសន្និសីទកាលពីព្រឹកមិញថា វឌ្ឍនាកា ជាកីឡាករម្នាក់ដែលមានឆន្ទ:ខ្ពស់ និងភាពប៉ិនប្រសព្វលើទីលា​ន អាចប្រជែងនៅលីគកំពូលជប៉ុនបាន។

« ខ្ញុំមានមោទនភាពមែនទែនចំពោះគេ ព្រោះពេលដែលខ្ញុំខលទៅគេ គេនិយាយថាចង់ពាក់អាវជម្រើសជាតិមែនទែន។ នេះជាមោទនភាពដែលកីឡាករទាំងអស់គួរតែមាន ហើយវឌ្ឍនាកាមានសមត្ថភាពបត់បែនបានល្អ ព្រមទាំងជំនាញដ៏ល្អលើទីលាន។ គាត់មិនមែនត្រឹមកីឡាករកម្ពុជាទេ គាត់ជាកីឡាករលំដាប់អាស៊ី ហើយអាចទៅលេងនៅលីគកំពូលជប៉ុនបាន។ » សម្តីគ្រូជម្រើសជាតិថ្មី។

វឌ្ឍនាកា បានចេញទៅលេងឲ្យក្លឹប Fujieda MYFC នៅជប៉ុន២សប្តាហ៍មកហើយ ប៉ុន្តែពុំទាន់មានឈ្មោះក្នុងប្រកួតផ្លូវការឡើយ។ យ៉ាងណាក្តីកូនប្រុសអភិបាលខេត្តកំពតរូបនេះថា សមត្ថភាពគេកើនឡើងជាលំដាប់ ហើយនឹងយកមកជួយកម្ពុជា សាងប្រវត្តិសាស្ត្រថ្មីបន្ថែម។

ជម្រើសជាតិកម្ពុជា នឹងបើកទ្វារពហុកីឡដ្ឋានជាតិកម្ពុជា ទទួលភ្ញៀវឥណ្ឌា នាល្ងាចថ្ងៃទី២២ ខែមីនា ស្អែកនេះ ក្នុងសមជើងមុនប្រកួតជម្រុះ AFC Asain Cup ។