ព័ត៌មានកីឡា

សិរី ប្រទេសខ្ទេចខ្ទាំដោយសង្គ្រាម តែវិស័យបាល់ទាត់កំពុងខ្លាំងមិនធម្មតា

ប្រិយមិត្តបានដឹងហើយថា សិរីជាប្រទេសដែលខ្ទេចខ្ទាំដោយសារសង្គ្រាមរយ:ពេលប៉ុន្មានឆ្នាំមកនេះ ដោយសឹងតែបំផ្លាញអស់ហើយនៅធនធានមនុស្សក៏ដូចជាអនាគតរបស់ក្មេងៗនៅប្រទេសនេះ។

យ៉ាងណាមិញ បើងាកទៅមើលវិស័យបាល់ទាត់វិញ សិរីកំពុងតែធ្វើប្រទេសផ្សេងៗកោតសរសើរហើយ ដោយពួកគេឈានដល់ជុំផ្ដាច់ព្រ័ត្រជម្រុះ World Cup 2018 ហើយក៏មានសង្ឃឹមថាអាចនឹងឡើងទៅបានផងដែរ។ គិតត្រឹមពេលបច្ចុប្បន្ននេះ ពួកគេឈរនៅលេខ៤មាន៨ពិន្ទុ តាមក្រុមលេខ៣ អូប៉េគីស្ថានមាន៩ពិន្ទុ ក្រុមលេខ២ កូរ៉េខាងត្បូងមាន១០ពិន្ទុ និងក្រុមកំពូលតារាងអឺរ៉ងមាន១៤ពិន្ទុ។

ដូច្នេះបើមើលតាមលទ្ធផលនេះ ពួកគេនៅតែមានឱកាសឡើងទៅវគ្គបន្ដបានដដែល ព្រោះអីនៅជុំនេះ យក២ក្រុមក្នុងពូលឡើងទៅប្រទេសរុស្ស៊ី ខណ:ដែលលេខ៣នឹងត្រូវបានលេង Play Off ផងដែរ។ ខណ:ដែលប្រកួតនៅល្ងាចនេះ សិរីនឹងត្រូវតតាំងជាមួយក្រុមខ្លាំងកូរ៉េខាងត្បូងនៅវេលាម៉ោង៦ល្ងាចនៅទឹកដីកូរ៉េផ្ទាល់។

សូមបញ្ជាក់ថាមូលហេតុដែលធ្វើឱ្យគេសរសើរសិរីនេះ ព្រោះថាកីឡាករជម្រើសជាតិទាំងអស់សុទ្ធតែមិនមានពេលគ្រប់គ្រាន់ដើម្បីហ្វឹកហាត់នោះទេ ដោយពួកគេខ្លះត្រូវគេចាប់ទៅធ្វើជាទាហានផង។ មួយវិញទៀត សម្រាប់ប្រាក់ចាយវាយវិញ សិរីក៏មិនមានច្រើនដូចគេដែរ ដោយពួកគេត្រូវសន្សំសម្ចៃគ្រប់បែបយ៉ាង ទម្រាំបានចេញប្រកួតម្ដងៗ៕

មតិយោបល់