ខ្សែប្រយទ្ធ Gareth Bale បានត្រៀមខ្លួន ក្នុងជំនួប El Clasico នៅលើទឹកដីអាមេរិក នាថ្ងៃទី ២៩ខាងមុខនេះហើយ ដែលកីឡាកររូបនេះមានជំនឿចិត្ត ក្នុងការផ្តួលក្រុម Barcelona ។

នៅក្នុងការធ្វើបទសម្ភាសន៍ ជាមួយ ESPN ខ្សែប្រយុទ្ធឆ្នើមរបស់ក្រុម Real Madrid កីឡាករ Gareth Bale បាននិយាយថា៖ ការប្រកួតជាមួយក្រុម Barcelona ដែលអ្នកគ្រប់គ្នាហៅថា El Clasico នៅថ្ងៃទី ២៩ ( ថ្ងៃទី ៣០ ក្នុងប្រទេសកម្ពុជា ) ខាងមុខនេះ នាពហុកីឡារដ្ឋាន Hard Rock Stadium មិនមែនជាការប្រកួតមិត្តភាពរវាងក្រុមទាំង២ឡើយ។ Bale បានបន្ថែមទៀតថា៖ ការប្រកួតនេះ វាសារៈសំខាន់ ខ្លាំងណាស់ចំពោះ Real Madrid យើងត្រូវការឈ្នះការប្រកួតនេះ មិនថា ជាមួយ Barcelona ឬក្រុមណាមួយឡើយ នៅក្នុងពាន International Champion Cup នេះ ពួកយើងចង់ឈ្នះការប្រកួតទាំងអស់។

ជាការពិតណាស់ នៅក្នុងការប្រកួត កីឡាករទាំងអស់ តែងតែចង់ឈ្នះការប្រកួតវមិនថាក្នុងលក្ខខ័ណ្ឌណាមួយនោះឡើយ ព្រោះថាវាជាការសាកនូវសមត្ថភាពរបស់ក្លិប និងកីឡាករ។ កត្តាដ៍សំខាន់ ដែល Bale បាននិយាយនៅក្នុងសម្តីចុងក្រោយរបស់គេនោះគឺ El Clasico រវាង Real Madrid និង Barcelona គឺជាការប្រកួតដ៍សម្បើម ដែលមនុស្សនៅជុំវិញពិភពលោក ទន្ទឹងរង់ចាំ ជាពិសេសនោះ ប្រជាជនអាមេរិក ដែលរង់ចាំមើល ដោយផ្ទាល់នូវការប្រកួត El Clasico នេះ។ ហេតុនេះហើយ វាមិនមែនជាការប្រកួតធម្មតាឡើយ ដែលទាមទារ ឲ្យមានការប្រឹងប្រែងខ្ពស់ ដូចការប្រកួតក្នុងលីគសម្រាប់ក្រុមទាំង២ ។

ម្យ៉ាងវិញទៀត Real Madrid នឹងយកឈ្នះការប្រកួតនេះ ដើម្បីបង្ហាញឲ្យអ្នកគាំទ្រទាំងអស់មើលឃើញថា Real Madrid គឺជាក្រុមកំពូលតែ១គត់ ក្នុងពិភពលោក។ ដូច្នេះហើយ ថ្វីបើ El Clasico នៅអាមេរិក ជាការប្រកួតមិត្តភាព តែវានឹងធ្វើឲ្យកក្រើកយ៉ាងខ្លាំង​ ព្រោះក្រុម Real Madrid និង Barcelona សុទ្ធតែចង់ឈ្នះរៀងខ្លួន​ ក្នុងនាមជាក្រុមសត្រូវសតវត្សរ៍។