ខ្សែប្រយុទ្ធវ័យក្មេង Paulo Dybala បានពាក់អាវលេខ១០ ជាផ្លូវការណ៍ហើយ សម្រាប់ក្រុម Juventus នៅរដូវកាលថ្មីនេះ ២០១៧-២០១៨ ។

ការទទួលបានអាវលេខ ១០ នៅ Juventus សម្រាប់រដូវកាលថ្មីនេះ បានបង្ហាញឲ្យឃើញថា ខ្សែប្រយុទ្ធវ័យ ២១ឆ្នាំ Paulo Dybala និងមិនចាកចេញពីក្រុម សេះបង្កង់ Juventus ឡើយ បើទោះបីជាមានការចាប់អារម្មណ៍យ៉ាងខ្លាំង ពីសំណាក់ក្រុម Real Madrid និង Barcelona ក៍ដោយ។ ប៉ុន្មានរដូវកាលមកហើយ ដែល Dybala បង្ហាញខ្លួនឲ្យ Juventus ដោយពាក់អាវស្លាកលេខ ២១ ប៉ុណ្ណោះ ខណៈអាវលេខ ១០ គឺកីឡាករឆ្នើមជាច្រើន ជាអ្នកពាក់អាវនេះ។ យ៉ាងណាវិញ តាមរយៈការទទួលបានអាវលេខ ១០នេះដែរ Dybala នឹងពាក់ជំនួសកីឡាករឆ្នើមៗមួយចំនួន ដែលធ្លាប់ពាក់អាវនេះ រួមមានដូចជា Carlos Tevez, Andre Pirlo និង Paul Pogba ដែលសុទ្ធសឹងជាតារាល្បីៗ របស់ Juventus ។

គួរបញ្ជាក់ផងដែរថា Paulo Dybala បង្ហាញខ្លួនបាន ៩៤ ប្រកួតឲ្យ Juventus និងរកគ្រាប់បាល់បញ្ចូលទីឲ្យក្លិបបាន ៤២គ្រាប់។ ដូច្នេះ Dybala គឺជាកីឡាករដ៍សំខាន់មួយរូបរបស់ក្រុម Juventus នៅរដូវកាលថ្មីនេះ ស្របពេលដែលក្លិបសម្រេចចិត្តឲ្យពាក់អាវលេខ ១០ ដែលជាលេខសំណាងរបស់ក្រុមសេះបង្កង់ Juventus នេះ។