នេះគឺជារឿង ដ៍ភ្ញាក់ផ្អើលមួយ សម្រាប់អ្នកតាមដានបាល់ទាត់ ខណៈក្រុម Barcelona មានបំណងចង់ទិញខ្សែបម្រើប្រយុទ្ធវ័យក្មេង Marco Asensio ពីក្រុមស្តេចស Real Madrid ។

បើតាមការចុះផ្សាយរបស់ ប្រភពពត៌មានពីប្រទេសអេស្ប៉ាញ Diario Gol បានឲ្យដឹងថា បន្ទាប់ពីពិបាក ក្នុងការតាមទិញ Philippe Coutinho ពីក្រុមហង្សក្រហម Liverpool ក្រុម Barcelona បានបង្វែរគោលដៅ មកទិញ Marco Asensio ពីក្រុមសត្រូវធំប្រចាំលីគ Real Madrid វិញ។ តាមរយៈការចង់បាន Asensio នេះ ក្រុម Barcelona បានចំណាយទឹកប្រាក់ ខ្ទង់ ៧២លានផោន ដើម្បីផ្តាច់កុងត្រារបស់ ខ្សែបម្រើប្រយុទ្ធអេស្ប៉ាញវ័យក្មេងនេះពីក្រុម Real Madrid តែម្តង។ យ៉ាងណាវិញ ទាក់ទងទៅនឹង ការចង់ទិញ Asensio ពី Real Madrid នេះ វាហាក់ដូចជាពិបាកខ្លាំងណាស់ សម្រាប់ Barcelona ព្រោះថា រវាងក្រុមទាំង២ ប្រៀបដូចជាទឹក និងភ្លើង នៅពេលជួបគ្នាម្តងៗ។

ថ្វីបើអតីតកាល Real Madrid ធ្លាប់ទិញកីឡាករ របស់ Barcelona ដូចជា Luis Figo និង Ronaldo (ប្រេសុីល) ក៍ដោយ តែក្រុម Barcelona ដូចជាកម្រ ក្នុងការទិញយកកីឡាករ ពី Real Madrid ណាស់។ ម្យ៉ាងវិញទើតនោះ Asensio គឺជាសំណព្វចិត្តរបស់លោក Zidane ព្រោះថា កីឡាកររូបនេះ តែងតែ បង្ហាញវត្តមាន គ្រប់ការប្រកួតធំៗឲ្យ Real Madrid និងតែងតែស៊ុតចូលទី ក្នុងព្រឹត្តិការណ៍ធំៗផងដែរ។ ជាងនេះទៅទៀត បើប្រៀបធៀប ជាមួយកីឡាករឆ្នើមផ្សេងៗ នៅ Real Madrid នាពេលកន្លងមក Asensio បានចូលលេងច្រើនជាង James Rodriguez, Mateo Kovacic និង Gareth Bale ( រងរបួស ) ផងដែរ។ ហេតុនេះហើយ តាមរយៈការចង់បាន Marco Asensio របស់ Barcelona ទំនងជាមិនមានពន្លឺឡើយ ដោយសារតែហេតុផលចម្បង Real Madrid មិនចង់លក់ ហើយ បើលក់ ក៍ Real Madrid មិនលក់ឲ្យក្រុម Barcelona ដែរទំនងជាលក់ឲ្យហង្សក្រហម Liverpool ច្រើនជាង ព្រោះថា ក្លិបអង់គ្លេសមួយនេះ ក៍ចង់បាន Asensio យ៉ាងខ្លាំង។

ដូច្នេះហើយ រង់ចាំមើលថា តើក្រុម Barcelona អាចលួងលោម ក្រុម Real Madrid ឲ្យលក់ Marco Asensio បានឬយ៉ាងណា នៅពេលដែលក្រុមយក្សអេស្ប៉ាញមួយនេះ ទិញមិនបាន Philippe Coutinho ពីហង្សក្រហម Liverpool ។