លោក Jose Mourinho អ្នកចាត់ការក្រុម បីសាចក្រហម Manchester United បានប្រាប់ Diario Gol ថា ក្រុមបីសាចក្រហម មិនចាំបាច់ចង់បានខ្សែប្រយុទ្ធរបស់ក្រុម Real Madrid កីឡាករ Gareth Bale ទៀតឡើយនៅពេលនេះ។
ជាការពិតណាស់ មួយរយ:ចុងក្រោយនេះ លោក Mourinho ពិតជាចង់បានខ្សែប្រយុទ្ធវែល Gareth Bale យ៉ាងខ្លាំង ដោយលោកព្រមទាំងបញ្ជាក់មហិច្ចតាថា នឹងទិញកីឡាកររូបនេះឲ្យបានផងដែរ។ យ៉ាងណាវិញ បន្ទាប់ពីការចាប់ផ្តើមការប្រកួតយ៉ាងល្អ នាពេលកន្លងមកនេះ អ្នកចាត់ការជនជាតិព័រទុយកាល់ រូបនេះ ហាក់ដូចជាមិនចង់បាន Bale ទៀតឡើយ ព្រោះថាកីឡាកររបស់ Man Utd នាពេលបច្ចុប្បន្ននេះ ល្មមគ្រប់គ្រាន់សម្រាប់បីសាចក្រហមហើយ។ ក្នុងនោះដែរ តាមរយ:សម្តីដែលលោក Jose Mourinho បានប្រាប់ទៅកាន់ Diario Gol បានបង្ហាញឲ្យឃើញថា ខ្សែប្រយុទ្ធវ័យក្មេង២រូប ដែលកំពុងឡើងជើង Marco Rashford និង Anthony Martial អាចធ្វើឲ្យក្លិប មិនចាំបាច់ទិញ Gareth Bale ទៀតឡើយ។
តាមរយ: ទិន្នន័យទាំងនេះ អាចបង្ហាញឲ្យឃើញថា លោក Mourinho មិនត្រូវការទិញកីឡាករថ្មីទៀតឡើយ ពោលលោកចង់ប្រើប្រាស់ធនធាន កីឡាករវ័យក្មេងល្អៗ ដែលកំពុងតែលេងឡើងជើងយ៉ាងខ្លាំង។ ម្យ៉ាងវិញទៀតនោះ Bale មិនល្អដូចមុនឡើយ ទាំងទម្រង់លេង និងល្បឿន ជាហេតុធ្វើឲ្យលោក Mourinho មានការពិចារណាច្រើន។ ជាងនេះទៅទៀត សមត្ថភាពរបស់ Rashford និង Martial នៅពេលនេះ ពិតជាមិនធម្មតាឡើយ ព្រោះថា កីឡាករទាំង២រូបនេះ កំពុងតែធ្វើឲ្យពិភពលោកមានការចាប់អារម្មណ៍យ៉ាងខ្លាំង ជាពិសេសនោះគឺ Marco Rashford ។
ដូច្នេះហើយ យុទ្ធសាស្ត្ររបស់លោក Jose Mourinho នៅពេលនេះគឺកាត់បន្ថយការចំណាយ ក្នុងការនាំយកកីឡាករពីខាងក្រៅ ហើយប្រើប្រាស់ និងបណ្តុះធនធានកីឡាករដែលមានស្រាប់ ដើម្បីជួយក្រុមឲ្យខ្លាំងក្លា ដូចជំនាន់លោក ដឹកនាំក្រុម Porto កាលពីអតីតកាលផងដែរ។
មតិយោបល់