ក្រុមស្តេចស Real Madrid បានសម្រេចចិត្តលក់ខ្សែប្រយុទ្ធដល់ទៅ ២រូបកាលពីរដូវក្តៅកន្លងមក រួមមាន Alvaro Morata និង Mariano Diaz ដែលកីឡាករទាំង២​នេះសុទ្ធសឹងកំពុងទទួលបានជោគជ័យនៅក្លិបថ្មីរបស់ពួកគេ។

ជាក់ស្តែងណាស់ ខ្សែប្រយុទ្ធវ័យក្មេង Mariano Diaz កំពុងតែសាងភាពល្បាញល្បី​ ក្នុងលីគកំពូលរបស់បារាំង នាពេលបច្ចុប្បន្ននេះ។​ ក្នុងនោះដែរ តាំងពីចាប់ផ្តើមការប្រកួតបើករដូវកាលកន្លងមកនេះឲ្យក្រុម Lyon ខ្សែប្រយុទ្ធវ័យក្មេងរូបនេះ​ បានរកគ្រាប់បាល់ ៤គ្រាប់ហើយក្នុងចំណោម៥ប្រកួតកន្លងមក ដោយមិនគិត ការប្រកួតមិត្តភាពមុនបើករដូវកាលកន្លងមកឡើយ។ Mariano Diaz កាលលេងឲ្យក្រុម​ Real Madrid ខ្សែប្រយុទ្ធវ័យក្មេងរូបនេះ មិនសូវបានលេងឡើយ ដោយប្រឈមតំណែងជាមួយខ្សែប្រយុទ្ធឆ្នើមៗ​ ច្រើនដូចជា Karim Benzema និង Alvaro Morata ។

យ៉ាងណាក៍ដោយ តាមរយៈការបង្ហាញទម្រង់លេងយ៉ាងល្អឲ្យក្រុម Lyon នៅរដូវកាលនេះ អាចបង្ហាញឲ្យឃើញថា ការលក់ Mariano Diaz អាចក្លាយជាកំហុសមួយសម្រាប់ Real Madrid ជាជាងការលក់​ Alvaro Morata ទៅឲ្យតោខៀវ Chelsea ។ ជាក់ស្តែង​ Mariano នៅមានវ័យក្មេងអនាគត់ល្អ​ ប្រសិនបើ Real Madrid ផ្តល់ឱកាសឲ្យកីឡាកររូបនេះ​ បានលេងច្រើននោះ​ ប្រហែលសមត្ថភាព មិនចាញ់ Marco Asensio ដែលកំពុងតែទទួលបានប្រជាប្រិយភាពឡើយ។ យ៉ាងណាក៍ដោយ Mariano Diaz ទំនងជាគិតត្រូវក្នុងការចាកចេញពី Real Madrid ទៅកាន់​ Lyon ព្រោះថា ពេលនេះ​រូបគេកំពុងតែធ្វើបានយ៉ាងល្អ​ និងចាប់ផ្តើមសាងភាពល្បីល្បាញ​ ក្នុងពិភពបាល់ទាត់។

ម្យ៉ាងវិញទៀត Mariano Diaz នឹងក្លាយជា Alexandre Lacazette ថ្មីរបស់ក្រុម​ Lyon ដែលរកគ្រាប់បាល់បានយ៉ាងច្រើនឲ្យក្រុម។ ដូច្នេះហើយ​ ការលក់​ Mariano Diaz ឲ្យក្រុម Lyon គឺជាកំហុសយ៉ាងធំមួយរបស់ក្រុម Real Madrid ។