ការប្រកួតបើកឆាក Champion League ដំបូងរបស់ក្រុម Paris Saint Germain ពិតជាអស្ចារ្យណាស់ ដោយបានយកឈ្នះយ៉ាងចាស់ដៃលើក្រុមម្ចាស់ផ្ទះស្កុតលែន Celtic ក្នុងលទ្ធផល ៥-០​ ។

នេះគឺជាលទ្ធផលយ៉ាងប្រសើរមួយសម្រាប់ក្រុម បារាំង Paris Saint Germain ដែលបានចំណាយលុយយ៉ាងមហិមា នាពេលកន្លងមក ក្នុងការទិញកីឡាករថ្លៃៗ យកមកពង្រឹងក្លិប។ ជាក់ស្តែងណាស់ ការប្រកួតបើឆាក UEFA Champion League ជាមួយក្រុម​ Celtic យប់មិញនេះ ក្រុម Paris Saint Germain បានបំបាក់ក្រុមម្ចាស់ផ្ទះយ៉ាងដំណំ ក្នុងលទ្ធផល ៥-០ ។ ក្នុងនោះដែរ កំពូលខ្សែប្រយុទ្ធ CNM របស់ក្រុមបារាំងមួយនេះ សុទ្ធសឹងរកគ្រាប់បាល់បានទាំង​អស់ក្នុងការប្រកួតដ៍សំខាន់មួយនេះ។

គ្រាប់បាល់ទី១ របស់ PSG កើតឡើងនៅនាទី ១៩​ដោយការស៊ុតយ៉ាងស្អាតរបស់ខ្សែប្រយុទ្ធតម្លៃ ២២២លានអឺរ៉ូ Neymar បន្ទាប់ពីការបញ្ជូនបាលយ៉ាងស្អាតពីកីឡាករ Adrien Rabiot ។ ចំណែកគ្រាប់ទី២វិញ រកបានដោយខ្សែប្រយុទ្ធចំណូលថ្មីបារាំងដែលទើបខ្ចីជើងក្នុងលក្ខខ័ណ្ឌទិញផ្តាច់ ១៦៦លានផោន Kylian Mbappe នៅនាទីទី ៣៤​ដោយការបញ្ជូនបាល់ពី Neymar ។ គ្រាប់ទី៣ រកបានដោយការទាត់បាល់ ១១ម៉ែត្រ របស់ខ្សែប្រយុទ្ធចាស់វស្សា Edison Cavani នៅនាទីទី ៤០​ ខណៈគ្រាប់ទី៤ ជាគ្រាប់ទាត់ចូលទីខ្លួនឯងរបស់កីឡាករ Mikael Lastig នៅនាទីទី៨៣​ និងគ្រាប់បាល់ចុងក្រោយនៅចុងម៉ោងនាទីទី ៨៩រកបានដោយ​ Edison Cavani ដដែលក្រោយពីការបញ្ជូនបាល់ឲ្យពីសំណាក់ Layvin Kurzawa ។

ចំណែកក្នុងពូល B​ ជាមួយគ្នានេះដែរ ក្រុម Bayern Munich បានយកឈ្នះលើក្រុម Anderlecht ក្នុងលទ្ធផល ៣-០ ផងដែរ។

https://www.youtube.com/watch?v=nk7BHohx0O0