ជ័យជម្នះផ្ទួនៗ​ ដែលក្រុមបីសាចក្រហម Manchester United បានទទួល នាពេលកន្លងមកនេះ បាននាំមកនូវភាព រីករាយយ៉ាងខ្លាំង ពីសំណាក់កីឡាករទាំងអស់ នៅក្នុងក្លិបជាមួយនឹងជោគ​ជ័យរបស់ពួកគេ​ ដែលកំពុងតែកើតមាន។

សម្រាប់លោក Jose Mourinho វិញ ពិតជារីករាយយ៉ាងខ្លាំងជាមួយនឹង ការរីកចម្រើនរបស់ក្លិប ក្រោមការដឹកនាំរបស់លោក។ ជាងនេះទៅទៀត អ្នកចាត់ការជាតិព័រទុយហ្គាល់រូបនេះ បានធ្វើការដាស់តឿន​ដល់កូនក្រុមរបស់លោកទាំងអស់ កុំឲ្យសប្បាយភ្លេចខ្លួន​ព្រោះថា ការប្រកួតនៅមានច្រើនទៀតណាស់ ដែលទាមទារ​ឲ្យពួកគេទាំងអស់ត្រូវប្រឹងប្រែងបន្តទៀត។ ជាក់ស្តែងណាស់ បើតាម ESPN reports បានដកស្រង់សម្តីរបស់លោក Jose Mourinho​ ដែលមានអត្ថន័យថា ៖ យើងកំពុងតែទទួលបានជោគជ័យ​ជាបណ្តើរៗហើយ ម្យ៉ាងវិញទៀត ពួកយើងកំពុងតែមានការវិវត្តន៍ ទៅមុខបានច្រើនណាស់ តែពួកយើងមិនត្រូវភ្លេចខ្លួនឡើយ ព្រោះថាពួកយើងមានមេរៀន កាលពីរដូវកាលមុនម្តងរួច​មកហើយ។

យ៉ាងណាវិញ លោក Mourinho នៅតែមានក្តីសង្ឃឹម​ច្រើន​ក្នុងការឈ្នះពាន Premier League ក្នុងរដូវកាលនេះ បើទោះបីជាមានគូប្រជែងជាច្រើន ដូចជា Man City, Chelsea និងក្រុមខ្លាំងជាច្រើនទៀតក្តី។ ជាងនេះទៅទៀត សម្រាប់ការវិលត្រឡប់មកកាន់ UEFA Champion League វិញ លោក Mourinho មានបំណងចង់ឲ្យក្រុម​ខ្លាំងទាំងអស់មានការរអា ជាមួយនឹង Man Utd ផងដែរ ខណៈលោកមិនបានបញ្ជាក់ពីបំណង​ ថាឈ្នះពាននេះឡើយ តែមហិច្ចតារបស់អ្នកចាត់ការរូបនេះ មិនតូចឡើយ។