ព័ត៌មានកីឡា

Chelsea ប្រឈមអវត្តមាន Morata ១ខែ

ក្រុមតោខៀវ Chelsea កំពុងតែមានការព្រួយបារម្ភយ៉ាង​ខ្លាំង ចំពោះរបួសរបស់ខ្សែប្រយុទ្ធអេស្ប៉ាញ Alvaro Morata ដែលអាចសម្រាកដល់ ១ខែ ឬច្រើនជាងនេះ បើតាមការឲ្យដឹងពីក្រុមគ្រូពេទ្យ។

ការអវត្តមាន ខ្សែប្រយុទ្ធ Alvaro Morata គឺជាបញ្ហាដ៍ចម្បងមួយសម្រាប់ក្រុមតោខៀវ Chelsea នៅ​ពេលនេះ ព្រោះថាក្លិបមួយនេះ មិនសូវមានខ្សែប្រយុទ្ធស្រួច​ឡើយ ក្រៅពីសម្បូរខ្សែបម្រើប្រយុទ្ធល្អៗនោះ។ ជាក់ស្តែងណាស់ បើតាមការឲ្យដឹងពី Daily Mail បានឲ្យ​ដឹងថា Alvaro Morata អាចប្រឈមនឹងការសម្រាក ១ខែ ឬច្រើនជាងនេះ ដោយសារកីឡាកររូបនេះ បានរងរបួសគន្លាក់ក្បាលជង្គង់ ក្នុងអំឡុងការប្រកួតជាមួយ​ក្រុម Man City កាលពីថ្ងៃសៅរ៍កន្លងមក ដែលអាចធ្វើឲ្យកីឡាកររូបនេះមិនបានលេងឲ្យ Chelsea ចំនួន ៦ប្រកួត ដោយគិតទាំងការជួប Roma ទាំង២ជើង នៅ Champion League ផងដែរ។

ការសម្រាកច្រើន សប្តាហ៍នះដែរ បានក្លាយជាការព្រួយបារម្ភមួយ សម្រាប់ក្រុមតោខៀវ Chelsea ព្រោះថា ក្រៅពី Morata នៅមានតែ Batzuayi ប៉ុណ្ណោះ ដែលអាចលេងប្រយុទ្ធស្រួចបាន ខណ: Pedro Rodriguez, Eden Hazard, Willians សុទ្ធសឹងលេង​បម្រើល្អជាងប្រយុទ្ធទាំងអស់។ ហេតុនេះហើយ Chelsea ដែលកំពុងត្រូវការពិន្ទុ ដើម្បីប្រជែងការពារតំណែងជើងឯក​ផងនោះ​ ពិតជាពិបាកយ៉ាងខ្លាំង ក្នុងការលេងដោយអវត្តមាន Morata បែបនេះ។

ប្រហែល​ជាលោក Antonio Conte នឹងជ្រើសយក Diego Costa មកជំនួស Morata បណ្តោះអាសន្នសិនហើយ ខណ:កីឡាករអេស្ប៉ាញរូបនេះ មិនទាន់ផ្លាស់ជាផ្លូវការណ៍ទៅកាន់ក្រុម Atletico Madrid ឡើយ។ ដូច្នេះហើយ រង់ចាំមើលថា តើ Chelsea នឹងប្រើប្រាស់ខ្សែប្រយុទ្ធរូបណាជំនួសតំណែងរបស់ Alvaro Morata នៅអំឡុងពេលរងរបួសនេះ?

មតិយោបល់