ក្រុមជម្រើសជាតិស៊ីរី កំពុងតែត្រៀមខ្លួន យ៉ាងល្អក្នុងការប្រ​កួតជាមួយក្រុមជម្រើសជាតិអូស្ត្រាលី ដែលប្រព្រឹត្តិទៅនៅ​ថ្ងៃទី៥​ តុលា ស្អែកនេះ។

ការប្រកួតជម្រុះជើងទី១ សម្រាប់ស្វែងរកក្រុមទី៥​ ប្រចាំទ្វីប​អាស៊ី ដើម្បីទៅប្រកួត FIFA World Cup ២០១៨ ក្នុងប្រ​ទេសរុស្ស៊ី​ រវាងក្រុមជម្រើសជាតិស៊ីរី និងអូស្ត្រាលី កំពុងតែ​ខិតជិតមកដល់ហើយ។ យ៉ាងណាវិញ សម្រាប់ក្រុមជម្រើស​ជាតិស៊ីរី ដែលត្រូវបើកទ្វារទទួល អូស្ត្រាលីនេះ មិនបានធ្វើឡើងក្នុងទឹកដីរបស់ ស៊ីរីឡើយ​ ដោយត្រូវធ្វើឡើងក្នុងប្រទេសម៉ាឡេស៊ី ដោយសារហេតុផល​ នយោបាយក្នុងប្រទេស។ យ៉ាងណាក៍ដោយ ស៊ីរី មិនខ្វល់ខ្វាយពីបញ្ហាអ្វីឡើយ គឺពួក​គេ​ ត្រូវការឈ្នះ ដើម្បី បន្តក្តីសង្ឃឹម ក្នុងការឡើងទៅលេង​ពានរង្វាន់ World Cup ដែលជាក្តីស្រម៉ៃរបស់ពួកគេ។ ក៍ប៉ុន្តែ អូស្ត្រាលី មិនមែនជាក្រុមខ្សោយឡើយ ព្រោះថា ក្រុមកុងគូរ៉ូ មួយនេះ តែងតែមានវត្តមាន ក្នុងព្រឹត្តិការណ៍ World Cup ជារៀងរាល់លើក ដោយហេតុនេះហើយ វាពិបាកបន្តិចសម្រាប់ ស៊ីរី ក្នុងការឆ្លងផុតវគ្គនេះ។

បើទោះជាយ៉ាងនេះក្តី ក្រុមជម្រើសជាតិស៊ីរី លេងដោយមិនមានការភ័យខ្លាចឡើយ ដោយសារតែពួកគេ បានត្រៀមខ្លួនរួចហើយ ដើម្បីឆ្លងកាត់ឧបសគ្គដ៍ធំនេះ ដើម្បីសម្រេចបំណងរបស់ពួកគេ ក្នុងការឆ្លងទៅកាន់ព្រឹត្តិ​ការណ៍ ដ៍ធំមួយនេះ។ ក៍ប៉ុន្តែ ប្រសិនបើឆ្លងផុតវគ្គជម្រុះនេះ ក្រុមណាមួយដែលឡើងនោះ ត្រូវទៅប្រកួត Play Off ជាមួយក្រុមដែលមានចំណាត់ថ្នាក់លេខ ៤នៅតំបន់ CONCACEF ២ជើងទៀត។ ដូច្នេះហើយ រង់ចាំមើលថា តើក្រុម​ជម្រើសជាតិស៊ីរី អាចធ្វើបានល្អទេ ក្នុងការប្រកួតជើងទី១នេះ មុននឹងបន្តទៅកាន់ការប្រកួតជើងទី២​ នៅលើទឹកដីអូស្ត្រាលីវិញ។

គួរបញ្ជាក់ផងដែរថា ក្រុមចំនួន ៤ បានឡើងទៅកាន់គ្គចែកពូល World Cup ហើយ រួមមាន ជប៉ុន, អារ៉ាប៊ីសាអូឌីត, អ៊ីរ៉ង់ និងកូរ៉េខាងត្បូង។