គ្រូបង្វឹកក្រុមតោខៀវ Chelsea លោក Antonio Conte ត្រូវបានទម្លាយឲ្យដឹងថា លោកនឹងចាកចេញពី Premier League នៅចុងរដូវកាលនេះ ដើម្បីទៅដឹកនាំក្លិបនៅអ៊ីតា​លី ដែលជាស្រុកកំណើតរបស់លោកវិញ។

បើតាមការចុះផ្សាយរបស់ Talk Sports បានឲ្យដឹងថា លោក Antonio Conte មិនមានបំណងចង់បន្តដឹកនាំនៅ​អង់គ្លេសទៀតឡើយ ដោយលោកចង់ត្រឡប់ទៅប្រទេសអ៊ី​តាលីវិញ។ យ៉ាងណាក៍ដោយ ប្រភពខាងលើនេះ បានឲ្យដឹងបន្ថែមទៀតថា លោក Conte មិនមានតំណែង​ ក្នុងការវិលត្រឡប់ទៅកាន់ក្លិបចាស់របស់លោក គឺ Juventus ឡើយ ប្រហែលជាលោកអាចក្លាយ ជាគ្រូបង្វឹកថ្មីរបស់ក្រុម AC Milan ដែលជាក្រុមកំពុងតែ​មានការអភិវឌ្ឍន៍ទៅវិញ។

ជាការពិតណាស់ AC Milan បានកំណត់គោលដៅគ្រូបង្វឹក ២រូបដែលមកជំនួសតំណែង​របស់លោក Montella នាពេលបច្ចុប្បន្ននេះ ដែលសុទ្ធសឹង​ជាគ្រូបង្វឹកល្បី និងជាជនជាតិអ៊ីតាលី​ ដែលរួមមានអតីតគ្រូ​បង្វឹកចាស់របស់ AC Milan លោក Carlo Ancelotti និងលោក Antonio Conte អតីតគ្រូបង្វឹកក្រុម Juventus និងជម្រើសជាតិអ៊ីតាលី។ ក៍ប៉ុន្តែ បើតាម Talk Sports ក្រុម AC Milan ហាក់ពេញចិត្តចំពោះលោក Conte ជាងលោក Ancelotti ថ្វីបើលោក​ Ancelotti ធ្លាប់ដឹកនាំ AC Milan ជោគជ័យក៍ដោយ។

ជម្រើសដែល AC Milan ពេញចិត្តលោក Conte នោះ​ ដោយសារតែលោក ចង់មកដឹកនាំនៅ អ៊ីតាលី ខណៈលោក Carlo Ancelotti មានបំណងចង់ទៅដឹកនាំ នៅ Premier League ទៅវិញ។ ដូច្នេះហើយ AC Milanកំពុងតែរង់ចាំដំណឹងល្អពីលោក Antonio Conte នៅចុងរដូវកាលនេះ ដើម្បីធានាថា ក្លិបពិតជាអាចនាំយក​គ្រូ​បង្វឹករូបនេះ បានមែន។