ក្រុមយក្សអេស្ប៉ាញ Barcelona បានសម្រេចចិត្តចុងក្រោយ ដោយដាក់តម្លៃត្រឹម ៩៧លាន​ផោនប៉ុណ្ណោះ ក្នុងការទិញ Philippe Coutinho ពីក្រុម ហង្សក្រហម Liverpool ។

បើតាម Mundo Deportivo ពីប្រទេសអេស្ប៉ាញបានឲ្យដឹងថា ក្រុម Barcelona នៅតែ​មិនបោះបង់ឱកាសក្នុងការនាំយកកីឡាករវ័យ ២៥ឆ្នាំ Philippe Coutinho ឡើយ។ ជាក់ស្តែងណាស់​ ក្រុមយក្សអេស្ប៉ាញមួយនេះ បានសម្រេចធ្វើការដេញថ្លៃឡើងវិញ លើខ្សែបម្រើប្រយុទ្ធប្រេស៊ីលរូបនេះ ដោយដាក់នូវតម្លៃសរុប ៩៧លានផោន។ ក្នុងនោះដែរ Barcelona ឲ្យតម្លៃខ្លួនត្រឹម ៨០ អឺរ៉ូ និងប្រាក់បន្ថែមផ្សេងទៀតចំនួន ៣០លានអឺរ៉ូ​ ដែលសរុបទៅ ១១០លានអឺរ៉ូ ស្មើនឹង ៩៧លានផោន។ យ៉ាងណាវិញ តាមរយ:តម្លៃថ្មីនេះ ក្រុម Liverpool មានការខាតបង់ច្រើន ព្រោះថាកាលពីរដូវក្តៅកន្លងមក Barcelona ហ៊ានផ្តល់តម្លៃខ្លួនដល់ទៅ ជិត ១៥០លានផោន តែពេលនេះថយមិនដល់ ១០០លានផោន​ផង។

ក៍ប៉ុន្តែ ប្រហែលជាក្រុមហង្សក្រហម Liverpool មិនទុក Coutinho ទៀតឡើយ ដោយសារតែក្លិបធ្លាប់បានសន្យាលក់ កីឡាករប្រេស៊ីល​រូប​នេះឲ្យក្រុម Barcelona ទៅហើយដែលនេះអាចក្លាយជា​ការបន្តក្តីស្រម៉ៃ របស់ Philippe Coutinho ទៅកាន់ Barcelona ។ ដូច្នេះហើយ ទំនងជាខែមករាខាងមុខនេះ ខ្សែបម្រើប្រយុទ្ធ Philippe Coutinho នឹងក្លាយជាសមាជិកថ្មីរបស់ក្រុម Barcelona ជាក់ជាមិន​​ខានឡើយ។