ការប្រកួតដណ្ដើមពានរង្វាន់ជើងឯកយុវជនអាយុក្រោម១៩ឆ្នាំ ប្រចាំទ្វីបអាស៊ី AFC U-19 Championhsip 2018 វគ្គជម្រុះ ប្រចាំពូល G ដែលកម្ពុជាធ្វើជាម្ចាស់ផ្ទះ បានចាប់ផ្តើមលក់សំបុត្រចូលរួមទស្សនាពីថ្ងៃទី២០ ខែតុលា ឆ្នាំ២០១៧នេះហើយ។

សម្រាប់តម្លៃសំបុត្រគឺដូចមុន កន្លែងមានដំបូលកៅអីជ័រ ១០០០០៛ នឹងកន្លែងមិនមានដំបូល ៥០០០៛ ហើយពេលវេលាបើកលក់ពីម៉ោង ៩ព្រឹក ដល់ ៦ល្ងាច នៅពហុកីឡដ្ឋានជាតិផ្ទាល់តែម្តង។ នៅក្នុងវគ្គជម្រុះនេះ គឺដើម្បីទទួលបានកៅអីឡើងទៅប្រកួតនៅជុំផ្ដាច់ព្រ័ត្រ ដែលធ្វើឡើងនៅប្រទេសឥណ្ឌូនេស៊ី ឆ្នាំ ២០១៨ ខាងមុខ។ ដើម្បីមានសិទ្ធិឡើងទៅជុំផ្ដាច់ព្រ័ត្រ គឺក្រុមទាំង ៤ ត្រូវតែធ្វើអោយបានល្អបំផុត ដោយត្រូវតែជាក្រុមដែលឈរលេខ១ក្នុងពូលជាដាច់ខាត ឬក្នុងនាមជាក្រុមដែលឈរនៅលេខ ២ ល្អបំផុត ទើបអាចឡើងជុំផ្ដាច់ព្រ័ត្របាន។

ក្រុមដែលនៅពូល G ជាមួយម្ចាស់ផ្ទះ U-19 កម្ពុជា រួមមាន៖ U-19 ចិន, U-19 មីយ៉ាន់ម៉ា និង U-19 ហ្វីលីពីន ដែលការប្រកួតគ្រោងនឹងចាប់ផ្ដើមពីថ្ងៃទី ២៤ រហូតដល់ថ្ងៃទី ២៨ ខែ តុលា ឆ្នាំ ២០១៧ នាពហុកីឡដ្ឋានជាតិ រាជធានីភ្នំពេញ៕