យោងតាមរបាយការណ៍របស់ Chronicle Live បានឱ្យដឹងថាកីឡាករ Aleksandar Mitrovic កំពុងទាក់ទាញចំណាប់អារម្មណ៍យ៉ាងខ្លាំងពីក្លិបប្រទេសចិនមួយចំនួន រួមទាំងក្រុមជើងឯកផងដែរ។

ក្លិប Shanghai Greenland Shenhua ដែលកំពុងប្រកបអាជីពនៅក្របខ័ណ្ឌ Chinese Super League បានចាប់អារម្មណ៍ នឹងចង់នាំយកខ្សែប្រយុទ្ធរូបនេះនៅរដូវកាលក្រោយ។ ទោះបីជាយ៉ាងណាក៏ដោយលោក Rafa Benitez គ្រូបង្វឹករបស់ក្រុម Newcastle United មិនទាន់បានធ្វើការសម្រេចចិត្តនៅឡើយទេ ថាតើគាត់អាចអនុញ្ញាតឱ្យកីឡាករចាកចេញពីក្លិបនៅខែមករានេះឫយ៉ាងណា។

ក្លិបរបស់ប្រទេសចិនអាចនឹងចាប់អារម្មណ៍យ៉ាងខ្លាំងលើកីឡាករ Mitrovic ក្រោយពីការទទួលជ័យជម្នះដ៏គួរឱ្យចាប់អារម្មណ៍របស់គាត់សម្រាប់ក្រុមជំរើសជាតិ Serbia ក្នុងជំនួបទល់នឹងជម្រើសជាតិចិន នាកីឡដ្ឋាន Guangzhou កាលពីថ្ងៃសុក្រ ខណ:ដែលខ្សែប្រយុទ្ធនេះ ស៊ុតចូល ២គ្រាប់ នៃជ័យជម្នះ ២-០។

ក្រោមដឹកនាំរបស់លោក Benitez ខ្សែប្រយុទ្ធ Newcastle United រូបនេះ ត្រូវបានទុកឱ្យនៅលេងជាកីឡាករបម្រុង អំឡុងពេលបរាជ័យ ១-០ ក្រោមស្នាដៃក្រុម AFC Bournemouth កាលពីសប្តាហ៍មុន៕