ក្រុមជើងខ្លាំងអង់គ្លេស Totenham Hotspur ពិតជាបង្ហាញទម្រង់លេងយ៉ាងល្អបំផុតក្នុងរដូវកាលនេះ ដោយ៥ប្រកួតកន្លងមក ក្រុមមួយនេះ លេងមិនទាន់ស្គាល់ចាញ់មួយប្រកួតនៅឡើយទេ។

ជាក់ស្តែងណាស់ យប់មិញនេះ ថ្វីបើ Tottenham មានកៅអីសុវត្ថិភាព ក្នុងការទៅកាន់វគ្គបន្តក៍ដោយ តែក្រុមអង់គ្លេសមួយនេះ នៅតែអាចវាយបកយកឈ្នះ ក្រុមជើងខ្លាំងអាឡឺម៉ង់ Dortmund វិញដដែល។ ក្នុងការប្រកួតនេះ ក្រុមម្ចាស់ផ្ទះ Dortmund បានរកគ្រាប់បាល់ ១គ្រាប់នាំមុខមុន តាមរយៈការស៊ុតរបស់ខ្សែប្រយុទ្ធ Pierre-Emerick Aubameyang នៅនាទីទី៣១ ដែលធ្វើឲ្យតង់ទី១ Dortmund នាំមុខ Spurs ១-០ ។

យ៉ាងណាវិញ ឈានចូលដល់តង់ទី២ ក្រុម Tottenham អាចវាយបកយ៉ាងល្អ ដោយរកគ្រាប់បាល់បាន២គ្រាប់មកវិញ តាមរយៈការស៊ុតរបស់ ខ្សែប្រយុទ្ធ Harry Kane នៅនាទីទី៤៩ និងកីឡាករកូរ៉េខាងត្បូង Heung-Min Son នៅនាទីទី៧៦ សរុបលទ្ធផលបញ្ចប់ការប្រកួត ក្រុម Tottenham បានយកឈ្នះក្រុម Dortmund ក្នុងលទ្ធផល ២-១​។ ដូច្នេះហើយ Tottenham និង Real Madrid ឡើងទៅកាន់វគ្គបន្តទៀត ខណៈក្រុម Dortmund និង​ APOEL Nicosia ត្រូវរង់ចាំអ៊ុតមើល ១ប្រកួតចុងក្រោយទៀត ដើម្បីឲ្យដឹងថា ក្រុមណាមួយដែលត្រូវត្រឡប់ទៅស្រុកវិញ និងក្រុមណាមួយ ត្រូវបន្តទៅលេងនៅ Europa League ទៀតនោះ។

គួរបញ្ជាក់ផងដែរថា​ សម្រាប់ខ្សែប្រយុទ្ធ Harry Kane កំពុងតែតាមពីក្រោយ Ronaldo ក្នុងនាមជាអ្នកទាត់ចូលទីច្រើនជាងគេ នៅ Champion League ត្រឹម២គ្រាប់ប៉ុណ្ណោះ ព្រោះថា Kane ស៊ុតបាន៦គ្រាប់ ចំណែក Ronaldo ស៊ុតបាន៨គ្រាប់។

https://www.youtube.com/watch?v=FpkSFh7TWLs