ហ្ស៊ីមបាវេៈ លោក រ៉ូប៊ឺត មួហ្គាបេ វ័យ ៩៣ ឆ្នាំ កាលពីថ្ងៃអង្គារ បានលាលែងពីតំណែងជាប្រធានាធិបតី នៃប្រទេសហ្ស៊ីមបាវេហើយ បន្ទាប់ពីលោកបានគ្រប់គ្រងប្រទេសនេះ អស់រយៈពេល ៣៧ ឆ្នាំកន្លងមក។ នេះបើយោងតាមសារព័ត៌មាន Channel News Asia ចេញផ្សាយនៅថ្ងៃទី២២ ខែវិច្ឆិកា ឆ្នាំ២០១៧។

ការលាលែងពីតំណែងនេះ បានធ្វើឡើងបន្ទាប់ពីមនុស្សរាប់ម៉ឺននាក់ បានបាតុកម្មប្រឆាំងនឹងលោក មួហ្គាបេ នៅរដ្ឋធានីហៃរៀរ ខណៈដែលពួកមេដឹកនាំគណបក្ស ZANU-PF កំពុងកាន់អំណាច បានអនុម័តដំណោះស្រាយ ក៏ដូចជាអំពាវនាវឲ្យលោក មួហ្គាបេ ចុះចេញពីតំណែងផងដែរ។

សូមជំរាបថា វិបត្តិនៅហ្ស៊ីមបាវេ បានកើតឡើងនៅអំទ្បុងពេលលោក មួហ្គាបេ បណ្ដេញអតីតអនុប្រធានាធិបតី លោក Emmerson Mnangagwa ចេញពីតំណែង ដែលធ្វើឲ្យអ្នកនយោបាយនៅក្នុងប្រទេសជាច្រើន យល់ថាលោកមានបំណងចង់ឲ្យប្រពន្ធខ្លួន កាន់តំណែងប្រធានាធិបតីបន្តពីរូបលោក៕