នាយកប្រតិបត្តិរបស់ក្លិបបាល់ទាត់អេស្ប៉ាញ Atletico Madrid លោក Enrique Cerezo មានការសប្បាយចិត្តយ៉ាងខ្លាំង ចំពោះវត្តមានការវិលមក​វិញ របស់ខ្សែប្រយុទ្ធអេស្ប៉ាញ Diego Costa ។

ក្នុងនោះដែរ តាមរយ:ការចុះផ្សាយរបស់ Talk Sports បានឲ្យដឹងថា លោក Enrique Cerezo បានរំពឹងទុកពីជោគជ័យរបស់ក្រុម Atletico Madrid បន្ទាប់ពីការមកកាន់ក្លិបសារជាថ្មី របស់កីឡាករ Diego Costa ។ ជាក់ស្តែងណាស់ លោក Enrique Cerezo បាននិយាយថា ” នៅទីនេះ គឺជាផ្ទះយ៉ាងល្អ សម្រាប់ Costa ក្នុងការប្រកបអាជីពបាល់ទាត់ ពួកយើងនៅទីនេះតែងតែស្វាគមន៍ចំពោះវត្តមានរបស់កីឡា​ករដ៍ល្អរូបនេះដដែល ” ។

យ៉ាងណាវិញនោះ Diego Costa បានផ្លាស់មកកាន់ Atletico Madrid ជាផ្លូវការណ៍ហើយ បន្ទាប់ពីអង្គុយមើលការប្រកួតតាំងពី​ដើមរដូវកាលកន្លងមក បន្ទាប់ពីវត្តមានរបស់ Alvaro Morata ផ្លាស់ពី Real Madrid ទៅកាន់តោខៀវ Chelsea ។ ក៍ប៉ុន្តែ ការវិលមកកាន់ក្លិបចាស់របស់គេ Atletco Madrid នេះដែរ Costa នឹងអាចបង្ហាញខ្លួនបានច្រើនឲ្យក្លិបអេស្ប៉ាញមួយនេះ ព្រោះថា រូបគេនឹងចាប់ដៃគូជាមួយមិត្តរួមក្រុមចាស់មាន Fernando Torres ខណ: Antoine Griezmann មិនទាន់ច្បាស់ថាបន្តនៅ Atletico Madrid ឬចាកចេញ​ឡើយ។ ម្យ៉ាងវិញទៀតលោក Enrique Cerezo រំពឹងថា Diego Costa នឹងជួយឲ្យក្រុម Atletico Madrid ប្រជែងយកពាន Laliga នៅរដូវកាលនេះ រួមទាំង Europa League ផងដែរ។

ដូច្នេះហើយ នាយកប្រតិបត្តិក្លិបបាល់ទាត់ Atletico Madrid នឹងផ្តល់ភាពកក់ក្តៅដល់ Diego Costa ក្នុងការវិលត្រឡប់មកវិញ ដើម្បីមហិច្ចតារបស់ក្លិបអេស្ប៉ាញ​មួយនេះ។