Post News Media ព័ត៌មានកីឡា Real Madrid ដ...

Real Madrid ដាក់គោលដៅ ៥០០លានផោន ទិញសុទ្ធតែតារាឆ្នើម តែគ្មានវត្តមាន Neymar ឡើយ

ក្រុមអធិរាជស Real Madrid បានបង្ហាញនូវខ្ទង់ចំណាយ​យ៉ាងច្រើនសន្ធឹកសន្ធាប់រហូតដល់ទៅ ៥០០លានផោន ក្នុង​ការទិញកីឡាករល្បី ៣រូប ខណ: Neymar បែរជាមិនស្ថិត​ក្នុងបញ្ជីទិញនេះឡើយ។

ថ្វីបើពេលកន្លងមក Real Madrid បានបង្ហាញនូវចំណាប់​អារម្មណ៍ក្នុងការទិញយក Neymar ពីក្រុម Paris Saint Germain ក៍ដោយ តែអ្វីដែលគួរឲ្យចាប់អារម្មណ៍នោះ ក្រុម​យក្សអេស្ប៉ាញមួយនេះ បានបង្ហើបពីទឹកប្រាក់យ៉ាងសន្ធឹក​សន្ធាប់ក្នុងការទិញកីឡាករ ៣រូបផ្សេងទៅវិញ។ ជាក់ស្តែងណាស់ បើតាមការចុះផ្សាយរបស់ The Mirror បានឲ្យដឹងថា Real Madrid នឹងចំណាយលុយដល់ទៅ ៥០០លានផោន នៅរដូវក្តៅខាងមុខនេះ ក្នុងការទិញយក Eden Hazard ពីក្រុមតោខៀវ Chelsea, Harry Kane ពីក្រុមមាន់ខ្នាយមាស Tottenham Hotspur និង Devid De Gea ពីក្រុមបីសាចក្រហម Manchester United ។

ក្នុងនោះដែរ ប្រភពខាងលើនេះ បានបញ្ជាក់យ៉ាងច្បាស់ថា Real Madrid បានផ្តល់តម្លៃខ្លួនម្នាក់ ២០០លានផោន ដល់ Hazard និង Kane ខណ: De Gea នឹងក្លាយជាអ្នកចាំទីដែលមានតម្លៃ​ខ្លួនខ្ពស់ជាងគេ ពោលគឺ ១០០លានផោន។ ក្នុងនោះដែរ អ្វីដែលជាចម្ងល់នោះ បើសិនជា Real Madrid ចំណាយលុយយ៉ាងច្រើនលើសលប់បែបនេះ យកទៅទិញ តារាឆ្នើមពី Premier League ទាំង៣រូបខាងលើនេះ ចុះសម្រាប់ Neymar វិញ តើ Real Madrid ទិញយឬទេ? ព្រោះថា បើ Real Madrid ចំណាយលុយទិញ Neymar ទៀតខ្ទង់ចំណាយរបស់ក្រុម​អេស្ប៉ាញមួយនេះ កើតឡើងចូលប្រមាណជា ៨០០លានផោន ដែលវាអាចនឹងមិនសមមូលជាមួយនិង​ចំណូលប្រចាំឆ្នាំ របស់ Real Madrid ដែលធ្វើឲ្យក្លិបអាចជាប់ពិន័យរបស់ FIFA បាន។

ដោយហេតុនេះហើយ តាមការមើលឃើញជាក់ស្តែង ប្រហែលជា Real Madrid ទិញ Eden Hazard, Harry Kane និង Devid De Gea តែមិនទិញយក Neymar ពីក្រុម Paris Saint Germain ឡើយ។