បន្ទាប់ពីជ្រុះចេញពី Champion League យ៉ាងមិននឹកស្មានដល់រួចមក ក្រុម Manchester City នឹងមិនឲ្យរបូត Premier League ឡើយ ដោយបំបាក់ក្រុមមាន់ខ្នាយមាសដល់ទឹកដី ខណៈ Man Utd វិញ បែរជាចាញ់ក្នុងទឹកដីខ្លួនឯង ជាហេតុធ្វើឲ្យ Manchester City ក្លាយជាជើងឯក Premier League រដូវកាលនេ ទាំងសល់ ៥ប្រកួតក្នុងដៃទៀត។

ជាក់ស្តែងណាស់ Manchester City ពិតជាបង្ហាញទម្រង់លេងបានយ៉ាងល្អ ដោយមកបំបាក់ក្រុមខ្លាំង Tottenham Hotspur ដល់ Wembley ក្នុងលទ្ធផល ៣-១ ។ ៣គ្រាប់របស់ Manchester City រកបានដោយការស៊ុតរបស់កីឡាករ Gabriel Jesus នៅនាទីទី២២, ការស៊ុតបាល់ ១១ម៉ែត្ររបស់កីឡាករ Ilkay Guendogen នៅនាទីទី២៥ និងគ្រាប់បាល់ទី៣ រកបានដោយ Raheem Sterling នៅនាទីទី៧២ ខណៈក្រុម Tottenham វិញ អាចវាយបកបានវិញត្រឹម១គ្រាប់ប៉ុណ្ណោះ ដោយការស៊ុតរបស់​កីឡាករ Christian Eriksen នៅនាទីទី៤២។

តាមរយៈលទ្ធផលនេះដែរ បានធ្វើឲ្យ Manchester City មាន ៨៧ពិន្ទុ នាំមុខដាច់ ១៦ពិន្ទុលើក្រុម Manchester United ដែលមាន ៧១ពិន្ទុ ក្រោយពីចាញ់ West Brom ជាហេតុធ្វើឲ្យក្រុម Manchester City បានឈ្នះពានមុនរដូវកាល បើទោះបីជានៅសល់ ៥ប្រកួតទៀតក៍ដោយ។