អ្នកចាំទីមានប្រជាប្រិយភាពជាង ២០ ឆ្នាំកន្លងមកនេះ Gianluigi Buffon នឹងបញ្ចប់កុងត្រាជាមួយក្រុមសេះ​បង្កង់ Juventus នៅបញ្ចប់រដូវកាលនេះហើយ ខណៈ​អនាគត់កីឡាកររូបនេះ មិនទាន់ដឹងច្បាស់ថាត្រូវបញ្ចប់អា​ជីព ឬបន្តទៀតឡើយ។

យ៉ាងណាវិញ បើតាមការចុះផ្សាយរបស់ The Mirror បានឲ្យដឹងថា ក្រុមជើងខ្លាំងអាហ្សង់ទីន Boca Juniors មានបំណងចង់នាំយកអ្នកចាំទីវ័យ ៤០ឆ្នាំអ៊ីតាលី Gianluigi Buffon ទៅកាន់អាហ្សង់ទីន នៅរដូវកាល​ក្រោយនេះ។ បើទោះបីជាមានវ័យជ្រេទៅហើយក្តី Buffon នៅតែទទួលការចាប់អារម្មណ៍ ពីសំណាក់ក្លិប​ធំៗ នៅក្រៅតំបន់អឺរ៉ុបដដែល មានទាំងចិន, អាមេរិក ហើយឥលូវនេះ ឈានដល់តំបន់ឡាទីនទៀត។

ក៍ប៉ុន្តែ នៅមិនទាន់ច្បាស់ថា Buffon យល់ព្រមផ្លាស់ទៅកាន់ Boca Juniors នៅឡើយទេ ព្រោះតាមប្រភពក្នុងស្រុក​ពីប្រទេសអ៊ីតាលី Buffon អាចនឹងសម្រាកពីបាល់ទាត់ ច្រើនជាងការបន្តអាជីពមួយនេះ។ ម្យ៉ាងវិញទៀត ជម្រើសជាតិអ៊ីតាលីវិញ ក៍បានត្រៀមកោះហៅ កីឡាកររូបនេះ មកជួយផងដែរ ក្នងនាមជាគ្រូជំនួយ ឬគ្រូ​បង្ហាត់អ្នកចាំទី ដែលកត្តានេះ អាចជាឧបសគ្គធំមួយ​ម្រាប់ Boca Juniors ក្នុងការនាំយក Buffon ទៅកាន់​អាហ្សង់ទីន។

យ៉ាងណាវិញក្លិបកំពូលអាហ្សង់ទីនរូបនេះ នៅតែមិនបោះបង់ឱកាសក្នុងការតាមប្រមាញ់ Gianluigi Buffon ឡើយដរាបណា Buffon មិនទាន់សម្រេចពីអនាគត់ច្បាស់នោះ។