Post News Media ព័ត៌មានកីឡា Neymar ទាមទារ...

Neymar ទាមទារលក្ខខណ្ឌខ្ពស់មួយពី PSG

ថ្វីបើកំពុងតែរងរបួសមែនពិត តែខ្សែប្រយុទ្ធប្រេស៊ីល Neymar បានទាមទារលក្ខខណ្ឌយ៉ាងសម្បើមមួយ ពីក្រុម Paris Saint Germain ប្រសិន​បើក្លិបបារាំងមួយនេះ ចង់រក្សាទុក Neymar នៅ League1 មួយរដូវកាលទៀត។

ជាក់ស្តែងណាស់ បើតាមការចុះផ្សាយរបស់ Time – Subcription Required បានឲ្យដឹងថា ខ្សែប្រយុទ្ធ Neymar បានទាមទារតម្លៃពលកម្មប្រចាំសប្តាហ៍ ១លានផោន ដើម្បីបន្តអនាគត់នៅ Paris Saint Germain បន្តទៀត។ ការទាមទារខ្ពស់បែបនេះ បណ្តាលមកពី កីឡាករប្រេស៊ីលរូបនេះ កំពុងតែទទួលបានការចាប់អារម្មណ៍យ៉ាងខ្លាំង ពីសំណាក់ក្រុម Real Madrid ហើយក្លិបអេស្ប៉ាញនេះដែរ បានត្រៀមលុយយ៉ាងច្រើនសន្ធឹកសន្ទាប់ ក្នុងការប្រ​មាញ់យក Neymar ពីក្រុម Paris Saint Germain ។

Neymar បានផ្លាស់ពី Barcelona មកកាន់ក្លិបសេដ្ឋីបារាំង កាលពីរដូវក្តៅកន្លងមក ក្នុងតម្លៃបំបែកកំណត់ត្រា ២២២លានអឺរ៉ូ ស្មើនឹង ១៩៦លានផោន ក៍ប៉ុន្តែ Neymar ហាក់កាឡុកក្លិបបារាំងនេះយ៉ាងខ្លាំង តាមរយ:ការទាមទារបាល់ ១១ម៉ែត្រមកស៊ុត ជាហេតុធ្វើឲ្យក្លិបចំណាយលុយ ១លានអឺរ៉ូ ដល់ Edinson Cavani ដើម្បីលួងចិត្តកីឡាករប្រេស៊ីលរូបនេះ។ ម្យ៉ាងវិញទៀត ថ្មីៗនេះដែរ Neymar បានទាមទារតម្លៃពលកម្ម ១លានផោន ក្នុងមួយសប្តាហ៍ ដើម្បីគំរាមក្លិប Paris Saint Germain ក្នុងការចាកចេញ ទៅកាន់ Real Madrid ។

គួរបញ្ជាក់ផងដែរថា បច្ចុប្បន្ននេះ Neymar ជាកីឡាករដែលមានតម្លៃ​ពលកម្ម ខ្ពស់ជាងគេបំផុត ពោល Neymar ទទួលបានតម្លៃពលកម្មប្រចាំសប្តាហ៍​៦៨ ម៉ឺនផោន ខណ:ការទាមទាររហូតដល់ទៅ ១ លានផោននេះដែរ វាពិបាកនឹងមានកីឡាករណាម្នាក់អាចទទួលបានតម្លៃពលកម្មខ្ពស់បែបនេះឡើយ សូម្បីតែ Cristiano Ronaldo និង Lionel Messi ក៍ដោយ។