សហព័ន្ធបាល់ទាត់ពិភពលោក ហៅកាត់ថា FIFA បានត្រៀមធ្វើកិច្ចប្រជុំសមាជិក ដើម្បីបង្កើតពានថ្មី ២ ទៀត នៅក្នុងពេលដ៍ខ្លីខាងមុខនេះ ដើម្បីឲ្យវិស័យបាល់ទាត់​កាន់តែកក្រើកជាងមុននោះ។

បើតាមរបាយការណ៍របស់ FIFA បានឲ្យដឹងថា នៅពាក់កណ្តាលខែឧសភា ខាងមុខនេះ FIFA នឹងមានប្រជុំ នៅទីក្រុង Zurich ប្រទេសស្វ៊ីស ដើម្បីសម្រេចអនុម័តបង្កើតពានថ្មី ២ បន្ថែមទៀត។ ពានដែល FIFA ត្រៀមបង្កើតនោះ មានដូចជាពាន Club World Cup និង Nations League ដែលធ្វើឲ្យក្រុមជម្រើសជាតិ និងក្លិបបាល់ទាត់អាជីព កាន់តែសកម្មក្នុងការដណ្តើមពានថ្មីនេះ។

ទាក់ទងចំពោះ ការចំណាយវិញ របាយការណ៍របស់ FIFA ក៍បានឲ្យដឹង​ដែរថា សហព័ន្ធត្រៀមចំណាយរហូតដល់ទៅ ២៥ ពាន់លានដុល្លា ដែលជាទំហំទឹកប្រាក់យ៉ាងច្រើន​សន្ធឹកសន្ទាប់។ មិនតែប៉ុណ្ណោះ FIFA គ្រោងរៀបចំព្រឹត្តិការណ៍ World Cup ឲ្យមាន ៤៨ ប្រទេសចូលរួមនៅឆ្នាំ ២០២០ ខណៈសព្វថ្ងៃនេះ មានតែ ៣២ ប្រទេសប៉ុណ្ណោះ។