បន្ទាប់ពីអាចនាំយកខ្សែបម្រើប្រយុទ្ធកូឡុំប៊ី James Rodriguez ក្នុងលក្ខខណ្ឌខ្ចី​ជើង កាលពីរដូវក្តៅកន្លងមក ខណៈរដូវក្តៅក្រោយនេះ ក្រុមជើងឯកអាឡឺម៉ង់មួយ​នេះ ចង់នាំយកកីឡាករមួយរូបទៀត ដែល Real Madrid ចង់លក់ចេញ ក្រោយពីធ្លាក់ទម្រង់យ៉ាងខ្លាំង។

បើតាមការចុះផ្សាយរបស់ The Guadian បានឲ្យដឹងថា ក្រុម FC Bayern Munich ចង់នាំយកខ្សែប្រយុទ្ធញ៉ាំញីដោយរបួស​ Gareth Bale មកកាន់អាឡឺម៉ង់ នៅរដូវកាលក្រោយនេះ។ បន្ទាប់ពីបែកធ្លាយដំណឹងនេះ Gareth Bale បានចេញមុខមកអះអាងថា រូបគេនឹងមិនផ្លាស់ទៅលេងឲ្យក្រុម Bayern Munich ឡើយ​ ដោយបន្តវត្តមានជាមួយ Real Madrid បន្តទៀត។

ម្យ៉ាងវិញទៀតនោះ ប្រសិនបើ Gareth Bale ចាកចេញពី Real Madrid មែននោះ គឺកីឡាកររូបនេះ ទៅលេងនៅ អង់គ្លេសវិញ ដោយមិនទៅលេងនៅ​អាឡឺម៉ង់ឡើយ។ ជាការពិតណាស់ ក្រុម Bayern Munich មានបំណងចង់​ធ្វើ​ដូច James Rodriguez​ អ៊ីចឹងគឺខ្ចីជើងមួយរដូវកាល ហើយចង់ទិញផ្តាច់នៅរដូវ​កាលបន្ទាប់ ប្រសិនបើ Bale អាចផ្ស៊ាំការលេងបានល្អ ជាមួយ Bayern Munich ដូច James Rodriguez ។

យ៉ាងណាវិញ Bale ចេញមុខបដិសេធ មិនផ្លាស់ទៅ​កាន់ Bayern Munich ឡើយ បើទោះបីជាកីឡាកររូបនេះ ត្រូចាកចេញពី Real Madrid ក៍ដោយ ខណៈ ក្លិបធំៗនៅអង់គ្លេស ចាំទទួល Bale ដៃពីរ។