ប្រទេសចិន នឹងក្លាយជាប្រទេសដំបូងគេបំផុត ដែលទទួលសិទ្ធិធ្វើជាម្ចាស់ផ្ទះ ពានរង្វាន់ថ្មី ដែល FIFA ត្រៀមបង្កើតឡើង គឺពាន Club World Cup ខណ:​ការចំណាយលុយវិញ ខ្ទង់ ១០០លានផោន។

បើតាមការចុះផ្សាយរបស់ BBC Sports បានឲ្យដឹងថា FIFA នឹងចាប់ដំណើរការ​ការប្រកួតពានរង្វាន់ Club World Cup នៅឆ្នាំ ២០២១ ខាងមុខនេះ ខណ:ពាន​មួយនេះ មិនដូចពានរង្វាន់ FIFI Club World Cup ឡើយ។ ក្នុងនោះដែរ ប្រទេសចិន នឹងក្លាយជាប្រទេសអាស៊ីទីមួយ ដែលទទួលសិទ្ធិធ្វើជាម្ចាស់ផ្ទះ នៃពានរង្វាន់មួយនេះ។

ពានរង្វាន់ Club World Cup នេះដែរ ខុសប្លែកពី FIFA Club World Cup ដែលជ្រើសរើសយកជើងឯកប្រចាំទ្វីបនីមួយៗ មកប្រកួត​ដណ្តើមពានមួយនេះ ក៍ប៉ុន្តែ សម្រាប់ Club World Cup នេះវិញ គឺចម្រាញ់យកក្រុមមកពីតំបន់អឺរ៉ុបចំនួន ១២ក្រុម និងក្រុមមកពីអាស៊ី, អាហ្រ្វិក និងអាមរេិកទាំងពីរ មកប្រកួតប្រជែងគ្នា ដោយរួមទាំងអស់ មាន ២៤ក្រុម។ ចំពោះ នៅតំបន់អឺរ៉ុបវិញ ហាក់មានអាទិភាព ខ្លាំងជាងគេ ដោយមានរហូតដល់ទី ១២ក្រុម ​ពោលស្មើនឹងពាក់កណ្តាលនៃក្រុមដែលមានវត្តមានប្រកួត ដោយសារតែសក្តានុពលនៅអឺរ៉ុប មានការរីកចម្រើន និងល្បីល្បាញគួរឲ្យកត់​សម្គាល់។

គួរបញ្ជាក់ផងដែរថា ក្រុមនៅតំបន់អឺរ៉ុបទាំង១២នេះ ជ្រើសយកតែក្រុមដែលធ្លាប់ឈ្នះ ជើងឯក Champion League និង​ Europa League ចាប់ពី៣ដងឡើងទៅ ទើបត្រូវអញ្ជើញឲ្យចូលរួមព្រឹត្តិការណ៍មួយនេះ។