ពត៌មានកន្លងមក ទាក់ទងនឹងអនាគត់របស់ខ្សែប្រយុទ្ធអេស្ប៉ាញ Alvaro Morata ក្នុងការផ្លាស់ទៅ Juventus និង AC Milan នៅមិនទាន់ច្បាស់នៅ​ឡើយទេ បន្ទាប់ពីក្រុមតោខៀវ Chelsea កំពុងត្រៀមចរចារជាមួយក្រុម Inter Milan វិញ។

បើតាមការចុះផ្សាយរបស់ Daily Mail បានឲ្យដឹងថា ក្រុតោខៀវ Chelsea មានបំណងចង់ឲ្យខ្សែប្រយុទ្ធ​ Alvaro Morata ផ្លាស់ទៅកាន់ក្រុម Inter Milan ច្រើនជាង Juventus និង AC Milan ។ ការធ្វើបែបនេះដោយសារតែ ក្រុមតោ​ខៀវ Chelsea មានបំណងចង់បានខ្សែប្រយុទ្ធ អាហ្សង់ទីន Mauro Icardi ពីក្រុម Inter Milan មកវិញ។ ជាការពិតណាស់ Icardi គឺជាខ្សែប្រយុទ្ធល្អមួយរូប​នាពេលបច្ចុប្បន្ននេះ ថ្វីបើមិនជាប់ជម្រើសជាតិអាហ្សង់ទីន តែ Icardi គឺជាកីឡាករ​ដែលស៊ុតបានច្រើនជាងគេប្រចាំរដូវកាលនេះ នៅ Italian Serie A ។

ម្យ៉ាងវិញទៀតនោះ ខ្សែប្រយុទ្ធរូបនេះ ក៍ជាមុខព្រួញសម្រាប់ក្រុមបាល់ទាត់ធំៗ ជាច្រើនចង់បានផងដែរ ជាហេតុធ្វើឲ្យក្រុម Chelsea មិនងាយស្រួលឡើយ​ប្រសិនបើធ្វើការប្រជែងដោយចាយលុយនោះ។ យ៉ាងណាក៍ដោយ ក្រុមតោខៀវ Chelsea មានខ្សែប្រយុទ្ធ Alvaro Morata ដើម្បីយកទៅចរចារ ជាមួយ Inter Milan ក្នុងគោលបំណង ប្តូរយក Mauro Icardi ត្រឡប់មកវិញ ដោយទំនងជាអាចចាយលុយបន្ថែមលើនេះ ៤០លានអឺរ៉ូព្រោះថា តម្លៃខ្លួន Morata នៅពេលនេះ ទាបជាង Icardi ។

ដូច្នេះហើយ​ ក្រុមតោខៀវ Chelsea នឹងបើកការចរចារមួយជាមួយក្រុម Inter Milanនៅពេលខាងមុខនេះ ដើម្បីផ្លាស់ប្តូរកីឡាករគ្នារវាង Alvaro Morata និង Mauro Icardi ។