ស្តេចបាល់ទាត់របស់ប្រទេសអាហ្សង់ទីន លោក Diego Maradona បានរិះគន់​លោក Sampaoli ដែលមិនព្រមផ្តល់ឱកាសដល់កីឡាករវ័យក្មេងមួយរូប ឲ្យចូលរួមជាមួយជម្រើសជាតិ ទៅលេង World Cup នៅប្រទេសរុស្ស៊ី។

បើតាមការចុះផ្សាយរបស់ Mundo Deportivo ពីប្រទសអាហ្សង់ទីន បានឲ្យដឹង​ថា លោក Diego Maradona ហាក់មិនពេញចិត្តចំពោះលោក Sampaoli ដែលជ្រើសយក Gonzalo Higuain ក្នុងចំណោមខ្សែប្រយុទ្ធរបស់អាហ្សង់ទីន​ទៅលេងព្រឹត្តិការណ៍ ពិភពលោក World Cup ។ Maradona បាននិយាយថា៖ អាហ្សង់ទីន មិនគួរណាចោលខ្សែប្រយុទ្ធ Top Scorer នៅអ៊ីតាលី Mauro Icardi ឡើយ ក្នុងចំណោម Lionel Messi, Sergio Aguero និង Paulo Dybala គួរតែមានឈ្មោះហើយ ក៍ប៉ុន្តែរវាង Higuain និង Icardi មិនគួរណាលោក Sampaoli ជ្រើសយក Higuain ឡើយ។

វីរបុរស ដែលជួយ​អាហ្សង់ទីនឈ្នះ World Cup កាលពីឆ្នាំ ១៩៨៦ រូបនេះ បានឲ្យដឹងទៀតថា Icardi​ គួរតែត្រូវលោក Sampaoli ផ្តល់ឱកាសឲ្យ ថ្វីបើ Higuain ជាកីឡាករមានបទពិសោធន៍ច្រើនមែន តែនៅពេលនេះ មិនដូចមុនឡើយ​ ព្រោះថា Higuain ហាក់ធ្លាក់ជើងជាងមុន ចំណែក Icardi វិញ កំពុងឡើងជើងយ៉ាងខ្លាំង។

ដូច្នេះហើយ ស្តេចបាល់ទាត់អាហ្សង់ទីន Diego Maradona ហាក់មិនពេញចិត្ត​ចំពោះ ការជ្រើសយក Gonzalo Higuain ក្នុងក្រុមជម្រើសជាតិអាហ្សង់ទីន ដោយចោល Mauro Icardi មិនផ្តល់ឱកាសឲ្យវិញ។