បើតាមកាសែត Marca របស់អេស្ប៉ាញបានសរសេរថាក្លឹប Atletico Madrid នៅតែរក្សាចិត្តចង់បាន Diego Costa ត្រលប់ទៅរួមក្រុមវិញ បើទោះបីជាក្រុម Chelsea មិនចង់លក់ក៏ដោយ។

លោក Diego Simeone គ្រូបង្វឹកក្រុម AT Madrid ត្រូវការខ្សែប្រយុទ្ធមុតម្នាក់ទៀតដើម្បីប្រើទម្រង់លេង ប្រយុទ្ធ៣នាក់នៅតំបន់ខាងលើ។ Griezmann និង Torres អាចសហការគ្នាបានហើយ ប៉ុន្តែនៅខ្វះម្នាក់ទៀត ដែលគ្រូបង្វឹករូបនេះចង់បាន។ ដោយ Costa ជាកីឡាករដែលធ្លាប់នៅក្រោមការដឹកនាំរបស់លោកស្រាប់ នោះហើយជាហេតុផលដែល AT Madrid ចង់បានខ្លាំង។

យ៉ាងណាមិញ Chelsea ហាក់មិនចង់លក់ខ្សែប្រយុទ្ធសញ្ជាតិអេស្ប៉ាញរូបនេះឡើយ ដោយសារតែលោក Conte គ្រូបង្វឹកថ្មីរបស់តៀខៀវ មិនទាន់អាចរកអ្នកជំនួសបាន។ ខណៈដែលរដូវកាលថ្មី ក៏ដូចជាការប្រកួតមិត្តភាពមុនបើករដូវកាលក៏ជិតនឹងចាប់ផ្ដើមទៅហើយ។

Costa ជាអតីតកីឡាករលេងនៅក្លឹប AT Madrid ដោយទើបតែផ្លាស់មក Chelsea នៅឆ្នាំ២០១៤ កន្លងទៅនេះទេ។ គិតត្រឹមរយៈពេល២រដូវកាលមកនេះ កីឡាករវ័យ២៧ឆ្នាំរូបនេះ បង្ហាញខ្លួនឱ្យតៀខៀវបាន៥៤ប្រកួត រកបាន៣២គ្រាប់៕