លោក Antonio Conte គ្រូបង្វឹកក្រុម Chelsea បានអះអាងថាលោកនឹងធ្វើឱ្យខ្សែបម្រើ Eden Hazard មានទម្រង់លេងល្អដូចជា Lionel Messi និង Cristiano Ronaldo ដែរ អំឡុងពេលប៉ុន្មានឆ្នាំខាងមុខនេះ។

ក្រុមតោខៀវបានបើកការប្រកួត Pre Season របស់ខ្លួនហើយកាលពីយប់មិញនេះ ប៉ុន្តែលទ្ធផលមិនសូវជាល្អប៉ុន្មាននោះទេ ដោយចាញ់ក្រុម Rapid Vienna ២- ០ ។ ក្រោយបរាជ័យក្នុងប្រកួតដំបូងនេះដែរ លោក Conte បាននិយាយថាកីឡាករទាំងអស់លេងបានល្អ ទោះជាចាញ់ក្នុងប្រកួតនេះក៏ដោយ។ វាជាប្រកួតមិត្តភាព លទ្ធផលមិនសំខាន់នោះទេ អ្វីដែលសំខាន់គឺការលេងរបស់កីឡាករម្នាក់ៗ។

គ្រូបង្វឹកសញ្ជាតិអ៊ីតាលីរូបនេះ បន្ដថាលោកនឹងពង្រឹងក្រុម Chelsea ឱ្យខ្លាំងឡើងវិញ ហើយនាំកីឡាករល្អៗមកបន្ថែមផងដែរ។ អ្វីដែលកាន់តែពិសេសទៀតនោះ អតីតគ្រូបង្វឹកក្រុមជម្រើសជាតិអ៊ីតាលីរូបនេះ បានសន្យាជាមួយអ្នកគាំទ្រថានឹងធ្វើឱ្យកីឡាករម្នាក់គឺ Hazard ក្លាយជា Messi ឬ Ronaldo ប្រចាំក្លឹប Chelsea តែម្ដង។

“ខ្ញុំនឹងធ្វើឱ្យ Hazard ខ្លាំងដូច Messi និង Ronaldo ដែរ។ ខ្ញុំមើលគាត់លេង គាត់ពិតជាល្អ សមត្ថភាព បច្ចេកទេស សក្ដិសមនឹងក្លាយជាកំពូលកីឡាករបាល់ទាត់ម្នាក់។ អ្វីដែលគាត់ខ្វះខាតគឺការណែនាំ បន្ថែមប៉ុណ្ណោះ”។ សម្ដីរបស់លោក Conte គ្រូបង្វឹកថ្មីរបស់ Chelsea ៕