លោក Zinedine Zidane គ្រូបង្វឹករបស់ក្លឹប Real Madrid បាននិយាយនៅថ្ងៃនេះថាក្លឹប Real Madrid ក៏កំពុងទាក់ទងទៅកីឡាករ Pual Pogba ដែរ បើទោះបីជាក្លឹប Manchester United ហាក់មានប្រៀបជាងក៏ដោយ។

បន្ទាប់ពីស្ងាត់ដំណឹងរឿង Pogba ទៅក្លឹប Man Utd វិញនោះ នៅថ្ងៃនេះក៏លេចធ្លាយដំណឹងមួយទៀតថាក្លឹប Real Madrid ក៏មកលូកដៃទិញយកខ្សែបម្រើសញ្ជាតិបារាំងពីក្រុម Juventus ដែរ។ ខណៈដែលដំណឹងនេះគឺចេញពីមាត់របស់ Zidane ដែលជាគ្រូបង្វឹករបស់ក្រុមអធិរាជសផ្ទាល់តែម្ដង។

Zidane បាននិយាយថា៖ “ពេលនេះយើងកំពុងនិយាយជាមួយ Pogba ។ ខ្ញុំមិនអាចនិយាយអ្វីបានច្រើនទេ ហើយគាត់ក៏មិនទាន់ក្លាយជាកីឡាកររបស់យើងដែរ។ អ្វីៗគ្រប់យ៉ាងអាចកើតមាន រហូតដល់រដូវកាលដោះដូរកីឡាករបិទបញ្ចប់នៅថ្ងៃទី៣១ខែក្រោយនេះ”។

Pogba ផ្លាស់ទៅ Man Utd ត្រូវបានជាប់គាំងដោយសារតែរឿងភ្នាក់ងាររបស់កីឡាករវ័យ២៣ឆ្នាំរូបនេះ ទារតម្លៃថ្នួលបន្ថែម១០លានផោនពីក្រុមបិសាចក្រហមលើទឹកប្រាក់១១០លានអឺរ៉ូទៀត។ ខណៈដែលពេលនេះ អ្វីគ្រប់យ៉ាងនៅមិនទាន់ប្រាកដយ៉ាងណានោះទេ ប៉ុន្តែក្លឹប Juventus បានទិញយកខ្សែប្រយុទ្ធតម្លៃថ្លៃ Gonzalo Higuin ពីក្លឹប Napoli បានហើយ ៩០លានអឺរ៉ូ៕