Francesco Totti វិរបុរសរបស់ក្លឹប Roma បានបង្ហាញការសោកស្ដាយចំពោះកីឡាករនាពេលបច្ចុប្បន្ននេះ ដែលមើលឃើញលុយធំជាងការស្រលាញ់វិស័យកីឡាបាល់ទាត់ ពោលគឺឱ្យតែនរណាដាក់លុយច្រើន នោះនឹងទៅលេងឱ្យអ្នកនោះ។

ការផ្ទេរ Gonzalo Higuain ទៅលេងនៅ Juventus ក្នុងតម្លៃខ្លួន៧៥លានផោន បានធ្វើឱ្យពិភពបាល់ទាត់មានការភ្ញាក់ផ្អើលជាខ្លាំង ព្រោះគ្មាននរណាអាចនឹកស្មានដល់ថាអាចទៅរួចនោះទេ។ សូម្បីតែកីឡាករ Totti ដែលលេងនៅលីគអ៊ីតាលីតាំងពីដើមមកក៏មិននឹកស្មានថាអាចទៅរួចនោះទេ។

ខ្សែប្រយុទ្ធរបស់ក្លឹប Roma ចាស់វស្សាខាងលើបាននិយាយថា៖ “កីឡាករបាល់ទាត់បច្ចុប្បន្នគឺដូចជាអ្នករសាត់អណ្ដែតអីចឹង ពួកគេដើរទៅតាមទឹកប្រាក់ មិនមែនបេះដូងជាអ្នកបញ្ជានោះទេ។ កាលពី១០ឆ្នាំមុន ប្រសិនបើខ្ញុំគិតពីប្រាក់ ខ្ញុំប្រហែលមិននៅ Roma ទេ។ សម្រាប់ខ្ញុំ វាជាការពេញចិត្ត មិនមែនដើរតាមលុយឡើយ”។

Juventus បានចុះកុងត្រារយៈពេល៥ឆ្នាំជាមួយ Gonzalo Higuain ក្នុងតម្លៃខ្លួន៧៥លានផោន។ ខណៈដែលតម្លៃខ្លួននេះបានធ្វើឱ្យខ្សែប្រយុទ្ធសញ្ជាតិអាហ្សង់ទីនរូបនេះក្លាយជាកីឡាករថ្លៃជាងគេលេខ៣លើលោក បន្ទាប់ពី Gareth Bale ៨៥លានផោន និង Cristiano Ronaldo ៨០លានផោន៕