គំនូររូបគោព្រៃកាន់ពានមួយ កំពុងទទួលបានការចាប់អារម្មណ៍យ៉ាងខ្លាំង តាមរយៈការចែកចាយលើបណ្តាញសង្គម។ មើលពីខាងក្រៅគេគ្រាន់តែឃើញថា វាជាក្តីស្រម៉ៃមួយសម្រាប់អ្នកគាំទ្រកម្ពុជាដែលចង់ឃើញជម្រើសជាតិខ្លួនលើកពានអន្តរជាតិណាមួយ។

ចំពោះវិចិត្រករ ឈុន វិចិត្រ ដែលជាម្ចាស់រូបនេះបានបញ្ជាក់ថា អត្ថន័យរបស់លោក គឺជម្រើសជាតិកម្ពុជានឹងកាន់ពាន Suzuki Cup។ លោកពន្យល់ថា ថ្វីបើកម្រិតជម្រើសជាតិ ត្រូវបានគេមើលឃើញថាពុំទាន់ដល់លំដាប់កាន់ពាន ប៉ុន្តែលោកថា ស្នាដៃរបស់ខ្លួននឹងអាចក្លាយជាផ្នែកមួយក្នុងការបំផុសស្មារតីអ្នកគាំទ្រ ទៅកាន់ក្រុមគោព្រៃ ដើម្បីប្រឹងប្រែងសម្រេចបំណងនេះ ពិសេសឆ្លងវគ្គជម្រុះតទល់ក្រុមខ្លាំង៣ទៀត នៅខែក្រោយ។

វិចិត្រករវ័យក្មេងដដែលបន្តថា លោកនឹងសម្រិតសម្រាំងបន្ថែមការគូរូបជម្រើសជាតិ កាន់តែច្រើន ដើម្បីលើកទឹកចិត្តពួកគេឲ្យខិតខំហ្វឹកហាត់ ដើម្បីសាងជ័យជម្នះជាប្រវត្តិសាស្ត្រនានា ជូនជាតិ។

ឈុន វិចិត្រ បានលេចមុខក្នុងបណ្តាញសង្គមដំបូងនៅប៉ុន្មានខែចុងក្រោយនេះ តាមរយៈវណ្ណកម្មរូបកីឡាករបាល់ទាត់ជាច្រើនលើបណ្តាញសង្គម ប្រកបដោយភាពរស់រវើក ហើយដូចរូបដើមស្ទើរទាំងស្រុងតែម្តង។