ខ្សែបម្រើ Charyl Chappuis ដែលមានរបួសខកខានចូលទីលានប្រកួតអស់ពេលជាច្រើនខែមកហើយនោះ ពេលនេះបានអាចចូលលេងវិញបានធម្មតា ថែមទាំងមានឈ្មោះក្នុងបញ្ជីជម្រើសជាតិថៃ ត្រៀមប្រកួតជម្រុះវគ្គទី២ FIFA World Cup 2018 ទៀតផង។

Chappuis រងរបួសជង្គង់ ដែលត្រូវវះកាត់ ហើយរូបគេបានអវត្តមានពីទីលានអស់រយ:ពេល១៨ខែមកហើយ។ កីឡាករវ័យ២៤ឆ្នាំរូបនេះ អាចចូលលេងវិញបានតាំងពីខែមេសាដើមឆ្នាំមកម្ល៉េះ ប៉ុន្តែទើបតែបានជាប់ឈ្មោះក្នុងបញ្ជីជម្រើសជាតិថៃវិញ ត្រៀមប៉ះក្រុមអារ៉ាប៊ីសាអ៊ូឌីតនៅដើមខែក្រោយនេះទេ។

លោក Kiatisuk Senamuang គ្រូបង្វឹកក្រុមជម្រើសជាតិថៃ បាននិយាយថាលោកសប្បាយចិត្តនៅពេលឃើញ Chappuis អាចចូលលេងវិញបាន ហើយវាមិនមែនជារឿងប្លែកទេ ដែលលោកកោះហៅកីឡាកររូបនេះត្រលប់មកវិញ បន្ទាប់ពីរូបគេឡើងទម្រង់លេងដូចដើម។

Charyl Chappuis ជាកូនកាត់ស្វីស ដែលលេងឱ្យក្លឹបអាជីព Suphanburi ។ កីឡាកររូបនេះ ជាប់ឈុតយុវជនរបស់ស្វីសតាំងពី U15 រហូតដល់ U20 ។ ដល់ឆ្នាំ២០១៣ រូបគេក៏សម្រេចចិត្តចូលលេងឱ្យជម្រើសជាតិថៃវិញ ដោយកាលនោះក្នុងឈុត U23 ហើយក៏បានជាប់ក្នុងឈុតធំតាំងពីឆ្នាំ២០១៤កន្លងមក រហូតដល់បច្ចុប្បន្ន៕