កីឡាករម្នាក់ឈ្មោះថា Victor Emenayo បានលាក់បាំងអាយុខ្លួនឯងថាទើបតែ២៣ឆ្នាំប៉ុណ្ណោះដើម្បីបានទៅលេងនៅក្លឹបShahdagh Qusar FK ក្នុងប្រទេសអាហ្សែបែហ្សង់ ខណៈដែលទៅដល់ទីនោះត្រូវគេសើបដឹងថាមានអាយុលើស៤០ឆ្នាំទៅទៀត។

ក្នុងលិខិតឆ្លងដែនរបស់ Emenayo បានបញ្ជាក់ថាកីឡាកររូបនេះទើបតែមានអាយុ២៣ឆ្នាំប៉ុណ្ណោះ ប៉ុន្តែបើតាមការសើបអង្កេតឱ្យបានច្បាស់លាស់ទៅ ទើបដឹងថារូបគេបានក្លែងលិខិតឆ្លងដែននោះ។ ខណៈដែលអាយុពិតប្រាកដរបស់គេអាចនឹងលើស៤០ឆ្នាំឯណោះ។

យ៉ាងណាមិញ ចំពោះរឿងនេះដែរ កីឡាករខាងលើបានធ្វើការបដិសេធតែម្ដងថាខ្លួនមិនបានកុហកនោះទេ ពោលគឺការពិតទើបតែអាយុ២៣មែន គ្រាន់តែមានកាយសម្បទាចាស់បន្តិចប៉ុណ្ណោះ។

រឿងខាងលើនេះបានធ្វើឱ្យគេនឹកឃើញកាលពីឆ្នាំ២០១៤កន្លងទៅ ពេលកីឡាករ Joseph Minala ដែលលេងឱ្យ Lazio បានកុហកអាយុខ្លួនឯងថាទើបតែ១៧ឆ្នាំទេ តែធាតុពិតទៅគឺដល់ទៅ៤២ឆ្នាំឯណោះ។

យ៉ាងណាមិញ អាយុកីឡាករបរទេសគឺគេគិតលើលិខិតឆ្លងដែន ដូច្នេះបើទោះជាមានការសើបដឹងយ៉ាងណាមែន ប៉ុន្តែមិនអាចប្រកែកជាមួយតុលាការណាបានទេ ពោលគឺលិខិតឆ្លងដែនដាក់ប៉ុន្មាន នោះអាយុកីឡាករប៉ុណ្ណឹងហើយ៕