Antonio Conte បានព្រមានដល់កូនក្រុមរបស់ខ្លួនថាត្រូវប្រឹងប្រែងបន្ថែមទៀត ទើបអាចប្រជែងជាមួយក្រុមខ្លាំងៗដូចជា Manchester City និង Manchester United បានក្នុងរដូវកាលនេះ។

Conte អ្នកចាត់ការក្រុម Chelsea សប្បាយចិត្តពេលឃើញកូនក្រុមរបស់ខ្លួនរកបាន៣ពិន្ទុកាលពីសប្ដាហ៍មុននេះ ដោយយកឈ្នះក្រុម Hull City។ យ៉ាងណាមិញ ការបរាជ័យក្រោមថ្វីជើងក្រុម Liverpool និង Arsenal កាលពីពេលកន្លងទៅនេះ គឺនៅតែជាសុបិន្តអាក្រក់សម្រាប់លោក Conte ដដែល ហើយក៏សង្ឃឹមថាកូនក្រុមទាំងអស់ប្រឹងប្រែងពង្រឹងសមត្ថភាពបន្តទៀតដែរ។

អតីតគ្រូបង្វឹកក្រុមជម្រើសជាតិអ៊ីតាលីខាងលើបានបន្ថែមថា៖ “យើងត្រូវយល់ថាយើងត្រូវពង្រឹងបន្ថែម។ បន្ទាប់មកយើងនឹងអាចលេងល្អជាងនេះ។ ពេលនេះខ្ញុំកំពុងគិតថាយើងត្រូវពង្រឹងបន្ថែមអ្វីទៀត ដើម្បីធ្វើការងារបន្ដទៅមុខ។ យើងត្រូវប្ដូរអតីតកាលមិនល្អរបស់យើង ឱ្យបានប្រសើរឡើងនៅពេលខាងមុខ”។

តោខៀវបច្ចុប្បន្ននេះ កំពុងស្ថិតនៅលេខរៀងទី៧ក្នុងតារាងលីគកំពូលអង់គ្លេស ខណៈដែលកាលពីបើករដូវកាលថ្មីនេះភ្លាម លោក Conte បានកំណត់ថាក្រុមរបស់លោកអន់ណាស់ក៏បានក្នុង Top 4 ដែរ។ យ៉ាងណាមិញ ក្រោយពីបញ្ចប់បេសកកម្មជួយក្រុមជម្រើសជាតិហើយ កីឡាករក្រុម Chelsea ទាំងអស់នឹងត្រូវត្រលប់មកហ្វឹកហាត់វិញ ដើម្បីត្រៀមប្រកួតជាមួយក្រុមខ្លាំង Leicester City និង Manchester United នៅសប្ដាហ៍ក្រោយ៕