Matteo Ghione ដែលជាអតីតកីឡាករលេងនៅក្រុមយុវជន Juventus បានចូលប្រលងចម្រៀងក្នុងកម្មវិធី X Factor នៅប្រទេសអ៊ីតាលី ប៉ុន្តែគួរឱ្យសោកស្ដាយរូបគេមិនបានជាប់ទៅវគ្គបន្ដនោះទេ ដោយធ្លាក់ត្រឹមវគ្គ audition។

Ghione ជាអតីតកីឡាករបាល់ទាត់ម្នាក់ដែលមានមិត្តរួមក្រុមដូចជា Claudio Marchisio និង Sebastian Giovinco ជាដើមកាលពួកគេនៅហ្វឹកហាត់ក្នុងក្រុម Juventus ជាមួយគ្នា។ តែចុងក្រោយGhione បែរជាបែកគំនិតខុសគេ ដោយមិនចង់ធ្វើជាកីឡាករបាល់ទាត់នោះទេ រូបគេចូលចិត្តតន្ត្រីច្រើនជាង ហើយក៏សម្រេចចិត្តប្រឡូកក្នុងវិស័យនេះតែម្ដង។

អតីតកីឡាករបាល់ទាត់រូបនេះ ធ្លាប់ចូលតាមកម្មវិធីទូរទស្សន៍ជាច្រើនមកហើយ ប៉ុន្តែការប្រកួតចុងក្រោយនេះគឺ X Factor នៅអ៊ីតាលី រូបគេមិនអាចបន្ដទៅមុខបានទេ ព្រោះមិនត្រូវបានគណកម្មធិការជ្រើសរើស។

មុននឹងចូលទៅប្រលងកម្មវិធីចម្រៀងនេះដែរ កីឡាករដែលមានដើមកំណើតនៅប្រេស៊ីលម្នាក់នេះ ធ្លាប់ចូលលេងបាល់ទាត់ក្នុងតំណែងជាខ្សែការពារម្នាក់ ប៉ុន្តែដោយសារតែមិនជោគជ័យក៏សម្រេចចិត្តប្រកាសឈប់លេងបាល់តែម្ដង៕