ព័ត៌មានកីឡា

ហេតុ​អ្វី​បាន​ជា​ខ្សែ​ប្រយុទ្ធ Man City ​តម​មិន​ញ៉ាំ​នំ​ខេក?

ខ្សែ​ប្រយុទ្ធ Nolito ​របស់​ក្រុម Manchester City ​បាន​បញ្ជាក់​ថា​ខ្លួន​តម​អាហារ​២​មុខ មិន​ញ៉ាំ​នោះ​ទេ គឺ​នំ​ខេក និង​ទឹក​ដែល​មាន​ជាតិ​ស្ករ​ច្រើន ព្រោះ​វា​អាច​បណ្ដាល​ឱ្យ​ធាត់​បាន។

Nolito ​បាន​បញ្ជាក់​ថា​ខ្លួន​តម​អាហារ​២​មុខ​នេះ តាំង​ពី​នៅ​ក្លឹប Barcelona ​មក​ម្ល៉េះ ដោយ​លោក Luis Enrique ​ជា​អ្នក​ហាម​ខ្លួន​មិន​ឱ្យ​ញ៉ាំ​របស់​ទាំង​នេះ ប្រសិន​បើ​ចង់​ឱ្យ​ខ្លួន​មាន​សមត្ថភាព ​និង​ក្លាយ​ជា​កីឡាករ​ល្អ​មួយ​រូប។ ស្រប​ពេល​មក​ដល់​ក្លឹប Manchester City ​នេះ ​រូបគេ​ក៏​នៅ​តែ​រក្សា​ការ​តម​នេះ​បន្ត​ដែរ ព្រោះ​លោក Pep ​ក៏​ជា​មនុស្ស​ម្នាក់​តឹងរឹង​ចំពោះ​រឿង​របប​អាហារ​របស់​កីឡាករ។

Nolito ​បាន​បញ្ជាក់​ដូច្នេះ​ថា​៖ “ខ្ញុំ​ធ្លាប់​លេង​នៅ​ឈុត​ទី​២​របស់ Barcelona ​ហើយ​ទៅ​លេង​នៅ Celta Vigo ​ទៀត គឺ​សុទ្ធ​តែ​ធ្វើ​ដូច្នេះ​ទាំង​អស់។ វា​ជា​រឿង​ល្អ​មួយ ​សម្រាប់​ខ្លួន​ឯង​ដែល​អាច​ធ្វើឱ្យ​ទម្រង់​លេង​ល្អ និង​លេង​មិន​សូវ​ចេះ​ហត់​ដូច​កីឡាករ​ណា​ដែល​មាន​មាឌ​ធំ​និង​លើស​ទម្ងន់​”។

ខ្សែ​ប្រយុទ្ធ​ជម្រើស​ជាតិ​អេស្ប៉ាញ​ខាង​លើ​នេះ ​ត្រូវ​បាន Man City ​ទិញ​យក​ពី​ក្លឹប Celta Vigo ​កាល​ពី​រដូវ​កាល​ដោះដូរ​កីឡាករ​កន្លង​ទៅ ខណ:​ដែល​ប៉ុន្មាន​ប្រកួត​មក​នេះ​រូបគេ​ក៏​បាន​ជួយ​ក្រុម​បាន​ច្រើន​ដែរ៕

មតិយោបល់