ប៉េកាំង: ក្រុមហ៊ុន Samsung នៅថ្ងៃច័ន្ទម្សិលមិញនេះ បានបដិសេធមិនទទួលខុសត្រូវ​ ចំពោះករណីផ្ទុះឆេះ Galaxy Note 7 នៅក្នុងប្រទេសចិន ជាពិសេសគឺមិនព្រមផ្ដល់សំណង ព្រមទាំងបានលើកឡើងថា ករណីផ្ទុះឆេះនោះមិនពាក់ព័ន្ធនឹងបញ្ហា​ថ្មនោះទេ។ នេះ​បើយោងតាម​ការចេញផ្សាយរបស់សារព័ត៌មាន WSJ នៅថ្ងៃទី២០ ខែកញ្ញា។

ក្រុមហ៊ុនបច្ចេកវិទ្យាយក្សកូរ៉េខាងត្បូងមួយនេះ បានបញ្ជាក់ថា ស្មាតហ្វូន Galaxy Note 7 ដែល​ផ្ទុះឆេះនោះ មិនមែនជារបស់ក្រុមហ៊ុន Samsung ឡើយ និងបានយកលេសថា អតិថិជនរូបនោះគឺបានទិញពីក្រុមហ៊ុន​ផលិតក្នុងស្រុកចិន ដែល​ការ​ច្រានចោលនេះ គឺធ្វើឡើងដោយពុំមានភស្ដុងតាងបញ្ជាក់ឡើយ ជាពិសេសគឺ​បានអះអាងយ៉ាងច្បាស់ថា វាមិនមានផ្ទុះដោយសារតែ​បញ្ហាថ្មឡើយ។

ពាក់ព័ន្ធនឹងបញ្ហានេះ ក្រុមហ៊ុនលក់ទំនិញអនឡាញនៅក្នុងប្រទេសចិន DJ.COM បានបញ្ជាក់ថា ស្មាតហ្វូន Galaxy Note 7 ចំនួន ២គ្រឿងដែលបានផ្ទុះនោះគឺបានបញ្ជាទិញពី Store របស់ខ្លួន ហើយពិតជារបស់​ក្រុមហ៊ុន Samsung និងបានបញ្ជាទិញនៅថ្ងៃទី០១ ខែកញ្ញា ពោលគឺនៅមុនពេល Samsung ប្រកាសប្រមូល Galaxy Note 7 នៅជុំវិញពិភពលោក។

គួរបញ្ជាក់ផងដែរថា តួលេខនៃការខាតបង់ ដែលបណ្ដាលមកពីការផ្ទុះឆេះនេះគឺមានទំហំរហូតដល់ ១ពាន់លាន​ដុល្លារអាមេរិក ហើយអ្វីដែល​ Samsung កំពុងតែជួបបញ្ហានោះគឺថា​ ចំនួនស្មាតហ្វូនដែលបាន​ប្រមូលគឺតិចតូចបំផុត ខណ:ដែលតួលេខពិតប្រាកដមានរហូតដល់ ២.៥លានគ្រឿង៕