លោក​ Mark Zuckerberg ដែលជានិស្សិតបោះបង់ចោលការសិក្សា ពីសាកលវិទ្យាល័យល្បីឈ្មោះលើពិភពលោកមួយឈ្មោះ Harvard ត្រូវបានអញ្ជើញឲ្យទៅទទួលសញ្ញាបត្រ។

នោះមិនមែនមានន័យថា លោក Zuckerberg មហាសេដ្ឋីវ័យ ៣២ ឆ្នាំរូបនេះ វិលត្រឡប់ទៅសិក្សាវិញនោះទេ។ តាមពិតទៅ គឺគាត់ត្រូវបានអញ្ជើញឲ្យឡើងថ្លែងសុន្ទរកថាផ្តល់អនុសាសន៍ទៅដល់ក្រុមនិស្សិតឆ្នាំសិក្សាថ្មី ២០១៧ ទន្ទឹមនឹងនោះ គាត់ក៏នឹងទទួលបានសញ្ញាបត្រកិត្តិយសមួយពីសាកលវិទ្យាល័យផងដែរ។

សាកលវិទ្យាធិការ នៃសាកលវិទ្យាល័យ Harvard លោកស្រី​ Drew Faust ក៏បានធ្វើការបកស្រាយពីមូលហេតុនៃការសម្រេចចិត្ត អញ្ជើញលោក Zuckerberg មកថ្លែងសុន្ទរកថា ក្នុងថ្ងៃប្រគល់សញ្ញាបត្រលើកទី ៣៦៦ នេះ ដោយសារចង់ឲ្យនិស្សិតជំនាន់ក្រោយ ស្វែងយល់ពីភាពជោគជ័យរបស់លោក។ ហើយនិស្សិតគ្រប់រូប ក៏អាចប្រជែងជាមួយលោក Zuckerberg ក្នុងការធ្វើឲ្យពិភពលោកផ្លាស់ប្តូរថ្មី ដូចដែលលោកបានធ្វើការប្តេជ្ញាចិត្ត អភិវឌ្ឍន៍បច្ចេកវិជ្ជាជាន់ខ្ពស់ និងលើកកម្ពស់វិស័យអប់រំ។

កាលពី ១០​ ឆ្នាំមុនសាកលវិទ្យាល័យ Harvard ធ្លាប់បានអញ្ជើញលោក Bill Gates ដែលជានិស្សិតបានបោះបង់ចោលការសិក្សា រួចក្លាយខ្លួនជាមហាសេដ្ឋីបច្ចេកវិជ្ជាទី ១ លើពិភពលោក ឲ្យមកថ្លែងសុន្ទរកថានៅសាកលវិទ្យាល័យ ដូចគ្នាផងដែរ។

ខាងក្រោមជាវីដេអូបង្ហាញថា លោក Zuckerberg បានទៅជួបលោក Bill Gates សុំឲ្យជួយផ្តល់អនុសាសន៍ សម្រាប់ការថ្លែងសុន្ទរកថារបស់លោកនាពេលខាងមុខ៖

សូមជម្រាបថា លោក Zuckerberg បានបោះបង់ការសិក្សាពីសាកលវិទ្យាល័យ Harvard អំឡុងពេលសិក្សាឆ្នាំទី ២ ក្នុងឆ្នាំ ២០០៤ ហើយបានផ្លាស់ទៅសិក្សានៅ Palo Alto ដែលជាមជ្ឈមណ្ឌលហ្វឹកហ្វឺនផ្នែកប្រព័ន្ធ Network នៅក្នុងរដ្ឋកាលីហ្វញ៉ា ក្រោយមកគាត់ក៏បានបង្កើតបណ្តាញសង្គមផ្ទាល់ខ្លួនមួយជាលើកដំបូង។ រយ:ពេល ១៣​ ឆ្នាំក្រោយមក បណ្តាញសង្គមរបស់លោក ចាប់ផ្តើមក្លាយខ្លួនទៅជាក្រុមហ៊ុនដ៏មានសក្តានុពលខ្លាំងជាងគេបង្អស់លើពិភពលោក។

គួរបញ្ជាក់ថា លោក Zuckerberg នឹងត្រូវឡើងថ្លែងសុន្ទរកថា​នៅសាកលវិទ្យាល័យ Harvard ក្នុងថ្ងៃទី ២៥ ខែ ឧសភា ខាងមុខនេះ៕

ប្រភពពត៌មាន៖ thebusinessinsider.com