Post News Media ព័ត៌មានបច្ចេកវិទ្យា អាមេរិកនឹងមាន...

អាមេរិកនឹងមានខ្សែរថ Hyperloop អាចដឹកអ្នកដំណើរពីញូយ៉ក ទៅវ៉ាស៊ីនតោន ប្រើពេលត្រឹម ២០ នាទី

ប្រជាជនអាមេរិក នាពេលឆាប់ៗខាងមុខ នឹងអាចធ្វើដំណើរពីទីក្រុង ញូយ៉ក ទៅទីក្រុង វ៉ាស៊ីនតោន ដោយចំណាយពេលត្រឹមតែ ២០ នាទី ប៉ុណ្ណោះ គឺតាមរយ:បំពង់ខ្សែរថភ្លើងល្បឿនលឿនថ្មីមួយហៅថា Hyperloop ដែលគ្រោងនឹងសាងសង់ឱ្យរួចរាល់មុនឆ្នាំ ២០២០។ នេះបើយោងតាមប្រភពព័ត៌មានពីគេហទំព័រ Fortune ចុះផ្សាយអាទិត្យម្សិលមិញ។

ខ្សែរថសម្រាប់ថ្ងៃអនាគតនេះ គឺជាគ្រោងការរបស់ក្រុមហ៊ុន Hyperloop One ដែលបានប្រកាសឡើងក្នុងព្រឹត្តិការណ៍មួយ នាទីក្រុងវ៉ាស៊ីនតោន កាលពីសប្តាហ៍មុន ដោយថា វានឹងអាចដឹកជញ្ជូនអ្នកដំណើរទៅមកពីទីក្រុងញូយ៉ក និងវ៉ាស៊ីនតោន ដោយចំណាយពេលត្រឹមតែ ២០ នាទីប៉ុណ្ណោះ ពោលគឺ រហ័សជាងឆ្ងាយពីខ្សែរថភ្លើងបច្ចុប្បន្ន ដែលត្រូវប្រើពេលរហូតដល់ទៅជាង ៣ ម៉ោង។

ក្រុមហ៊ុនបានថ្លែងបន្ថែមថា ពួកគេចង់តភ្ជាប់ពលរដ្ឋអាមេរិក ៨០% តាមរយ:បំពង់រថល្បឿនលឿនប្រើប្រាស់បច្ចេកវិទ្យាអេឡិចត្រូម៉ាញេទិច ហើយពលរដ្ឋអាមេរិក ៨៣ លាននាក់ នឹងទទួលបានប្រយោជន៍ពីធម្យោបាយដឹកជញ្ជូនថ្មីនេះ។

ក្រុមនាយកមកពី Hyperloop One ក៏បាននិយាយដែរថា ពួកគេចង់ផ្តល់មធ្យោបាយធ្វើដំណើរឆ្លងប្រទេសផ្សេងៗ ដែលអនុញ្ញាតឱ្យមនុស្សអាចត្រាចចរទៅទីកន្លែងណាក៏បានក្នុងទឹកដីសហរដ្ឋអាមេរិក ដោយប្រើពេលក្មិនលើសពី ៥ ម៉ោង។ ក្រុមហ៊ុនកំពុងធ្វើការលើបំពង់រថល្បឿនលឿននេះ ដើម្បីអាចចល័តយានដឹកទំនិញពីតំបន់ East Coast ទាំងពីរ ឱ្យបានមុនឆ្នាំ ២០២០ ហើយអ្នកដំណើរប្រហែលជាអាចនឹងប្រើប្រាស់មធ្យោបាយធ្វើដំណើរល្បឿន ៧០០ ម៉ៃយ៍/ម៉ោង ឬស្មើនឹង ១១២៦ គីឡូម៉ែត្រ/ម៉ោង នេះ នៅឆ្នាំបន្ទាប់។

លោក Gabe Klein អតីតប្រធាននាយកដ្ឋានដឹកជញ្ជូនរដ្ឋវ៉ាស៊ីនតោន D.C បាននិយាយថា «ខ្ញុំគិតថា វានឹងក្លាយជាការពិត»។ «យើងកំពុងឋិតនៅក្នុងការផ្លាស់ប្តូរដ៏ធំមហាសាល ក្នុងវិស័យដឹកជញ្ជូនផ្លូវគោកចម្ងាយផ្លូវឆ្ងាយ»៕

ប្រភពព័ត៌មាន: cosmopolitan