ភ្នំពេញៈ ក្រុមហ៊ុន Chevrolet កម្ពុជា បានប្រកាសកម្មវិធីផ្តល់សេវាកម្ម និងការធានាគុណភាពរថយន្តរយៈពេលយូរបំផុត នៅឯពិធីជប់លៀងថ្លែងអំណរគុណអតិថិជនដែលបានជាវរថយន្ត Chevrolet ពីខែមករា ដល់ខែមិនា នៅឯភោជនីយដ្ឋាន Topaz នាល្ងាចថ្ងៃអាទិត្យកន្លងទៅនេះ។

ក្នុងឱកាសដ៏មហោឡារិក ក្រោមវត្តមានអតិថិជន និងភ្ញៀវកិត្តិយសដ៏ច្រើនកុះករនោះ លោក ប៉ែន ពិសិដ្ឋ ប្រធានគ្រប់​គ្រង​ទូទៅនៃក្រុមហ៊ុន United Auto Trading Co., Ltd. ដែលជាក្រុមហ៊ុនតំណាងចែកចាយរថយន្តម៉ាក Chevrolet តែមួយគត់នៅកម្ពុជា បានមានប្រសាសន៍ថា «ក្រុមហ៊ុន Chevrolet កម្ពុជា មិនត្រឹមតែផ្តល់ជូនលោកអ្នកនូវរថយន្តដែលមានគុណភាពខ្ពស់បំផុតប៉ុណ្ណោះទេ ប៉ុន្តែ យើងក៏នឹងផ្តល់ជូននូវសេវាកម្មល្អបំផុតក្នុងការថែទាំរថយន្តរបស់អតិថិជនដែលហៅថាសេវាកម្ម iCare ផងដែរ»។

លោកបានបន្ថែមថា «Chevrolet iCare គឺជាសេវាកម្មវែងជាងគេ រាប់បញ្ចូលកម្មវិធី 3+3 ដែលផ្តល់នូវការធានា និងសេវាថែទាំគុណភាពរថយន្តសម្រាប់រយៈពេលរហូតដល់បីឆ្នាំ»។ ក្នុងនោះ ក្រុមហ៊ុននឹងផ្តល់ជូននូវសេវាស្ទូចរថយន្តនៅក្នុងទីក្រុងភ្នំពេញ ពេលអតិថិជនមានបញ្ហា ក៏ដូចជាផ្តល់ជូននូវរថយន្តជំនួសក្នុងករណីរថយន្តរបស់ពួកគេ មានបញ្ហាជួសជុលដែលត្រូវការចំណាយពេលយូរ។

បន្ថែមពីលើនេះ ដើម្បីបំពេញគម្រោង iCare ឱ្យកាន់តែប្រសើរ លោក ពិសិដ្ឋ បានឱ្យដឹងថា ក្រុមហ៊ុននឹងពង្រីកបន្ថែមទៀតនូវសេវាកម្មក្រោ​យពេលលក់ នៅមជ្ឈមណ្ឌលក្នុងខេត្តមួយចំនួនដូចជា បាត់ដំបង សៀមរាប កំពង់ចាម រាជធានីភ្នំពេញ និងកន្លែងផ្សេងៗជាច្រើនផ្សេងទៀត ក្នុងពេលឆាប់ៗនេះ។

អតិថិជនទាំងអស់អាចទទួលបាននូវបទពិសោធន៍ថ្មីចំពោះការិយាល័យតាំងបង្ហាញរថយន្តស្តង់ដារអន្តរជាតិពីក្រុមហ៊ុន Chevrolet Cambodia នៅក្នុងប្រទេសកម្ពុជា រួមជាមួយបុគ្គលិកដែលប្រកបដោយជំនាញវិជ្ជាជីវៈ នៅរង់ចាំបម្រើសេវាកម្មយ៉ាងកក់ក្តៅ។

គួរបញ្ជាក់ថា ក្រុមហ៊ុន United Auto Trading បាននាំចូលរថយន្ត Chevrolet មកក្នុងទីផ្សារនៃប្រទេសកម្ពុជា ក្នុងឆ្នាំ ២០១៣ ហើយបច្ចុប្បន្ន ម៉ាកសញ្ញារថយន្តអាមេរិកមួយនេះ មានវត្តមាននៅក្នុងប្រទេសចំនួន ១៤០ និងលក់ដាច់បានប្រមាណ ៤ លានគ្រឿង ក្នុងមួយឆ្នាំៗ៕