យោងតាមរបាយការណ៍ពី IDC ក្រុមហ៊ុនផលិតស្មាតហ្វូន Huawei អាចដណ្តើម​យកតំណែងជាក្រុមហ៊ុនលក់ស្មាតហ្វូនដាច់ជាងគេបំផុតនៅក្នុងប្រទេសចិន ពីក្រុមហ៊ុន Oppo មកវិញបានហើយ សម្រាប់ត្រីមាសទី១ ឆ្នាំ​ ២០១៧ នេះ។

របាយការណ៍ដដែលរកឃើញថា នៅត្រីមាសដំបូងក្នុងឆ្នាំនេះ ស្មាតហ្វូនសរុបដែលបានលក់ចេញនៅក្នុងប្រទេសចិនគឺមានចំនួន ១០៣.១ លានគ្រឿង ក្នុងនោះ Huawei លក់បាន ២០.៨ លានគ្រឿង កើន ២៥.៥% ខណៈ Oppo លក់បាន ១៨.៩ លានគ្រឿង កើន ១៩.៥%។

កំណើននេះ ត្រូវបានក្រុមហ៊ុនស្រាវជ្រាវទីផ្សារ IDC រកឃើញថា ដោយសារប្រជា​ប្រិយភាពនៃកំពូលស្មាតហ្វូនជំនាន់ចុងក្រោយ P10 និង P10 Plus និងសន្ទុះនៃការលក់របស់ Honor V9 របស់ Huawei។ ចំណែកក្រុមហ៊ុន Vivo ទទួលបានចំណាក់ថ្នាក់លេខ៣ លក់ដាច់បាន ១៤.៦ លានគ្រឿង តាមពីក្រោយដោយក្រុមហ៊ុន Apple និង Xiaomi លក់ដាច់បាន ៩.៦ លានគ្រឿង និង ៩.៣ លានគ្រឿង។ ដោយឡែក ក្រុមហ៊ុន Samsung ពុំបានជាប់ក្នុងចំណាក់ថ្នាក់កំពូលទាំង ៥ នោះទេ។

គួរបញ្ជាក់ថា កាលពីឆ្នាំ ២០១៦ Oppo គឺជាក្រុមហ៊ុនលក់ទូរសព្ទឈានមុខគេបង្អស់នៅក្នុងទីផ្សារប្រទេសចិន ជាមួយតួលេខលក់ ៧៨.៤ គ្រឿង តាមពីក្រោយដោយក្រុមហ៊ុន Huawei, Vivo, Apple, និង Xiaomi ជាមួយចំនួន ៧៦.៦ លានគ្រឿង ៦៩.២ លានគ្រឿង ៤៤.៩ លានគ្រឿង និង ៤១.៥ លានគ្រឿង។ នេះបើយោងតាមរបាយការណ៍ IDC ដដែល៕

ប្រភពព័ត៌មានៈ zdnet