ក្រុមហ៊ុនផលិតបន្ទះឈីប Qualcomm នៅថ្ងៃអង្គារនេះ បានប្រកាសចេញនូវបន្ទះ​ឈីប Snapdragon ជំនាន់ថ្មីពីរម៉ូឌែលគឺ 630 និង 660 ដែលមានសមត្ថភាពកាន់តែខ្លាំងសម្រាប់ទូរសព្ទតម្លៃធម្យម ក្នុងព្រឹត្តិការណ៍របស់ខ្លួនមួយ នាប្រទេសសិង្ហបុរី។

បន្ទះអង្គប្រតិបត្តិ Snapdragon 630 និង 660 ទាំងពីរនេះ ត្រូវបានក្រុមហ៊ុនអះអាងថា នឹងជួយបង្កើនល្បឿនតភ្ជាប់អិុនធើណែតតាមប្រព័ន្ធ 4G និង Wi-Fi ឱ្យកាន់តែលឿន អាចគាំទ្រសមត្ថភាពកាមេរ៉ារហូតដល់ ២៤ មេហ្គាភិចសែល និងអង្គគណនាក្រាហ្វិចដែលមានសមត្ថភាពកាន់តែខ្លាំង អាចទ្រទ្រង់ការចាក់បញ្ចាំងរូបភាព-វីដេអូកម្រិត 4K និងអេក្រង់ខ្នាត QHD (២៥៦០x១៤៤០ ភិចសែល)។

បន្ថែមពីលើនេះ CPU ថ្មីទាំងពីរម៉ូឌែល ត្រូវបានរចនាឡើងតាមបច្ចេកវិទ្យាផលិតបន្ទះឈីបចុងក្រោយគេបង្អស់ គឺ 14nm ដែលត្រូវបានយកទៅប្រើក្នុងការផលិតបន្ទះឈីប Snapdragon 820 និង 821 ជំនាន់ចុងក្រោយរបស់ខ្លួន ហើយវាត្រូវបានគេរំពឹងថា នឹងយកទៅបំពាក់លើទូរសព្ទរបស់ក្រុមហ៊ុនចិនដូចជា Xiaomi, Oppo, និង​ Vivo ឆាប់ៗខាងមុខជាមិនខាន៕

ប្រភពព័ត៌មាន: cnet