ក្រុមហ៊ុន Rocket Lab បានបង្កើតប្រវត្តិសាស្រ្តថ្មីមួយសម្រាប់ប្រទេសណូវែលហ្សឺឡង់ បន្ទាប់ពីខ្លួនបានបាញ់បង្ហោះកាំជ្រួចថ្មីមួយឈ្មោះ Electron ទៅកាន់គន្លងភពផែនដីជាលើកដំបូង ប្រកបដោយជោគជ័យ នៅថ្ងៃព្រហស្បត្តិ៍មិ្សលមិញនេះ។

ការបាញ់បង្ហោះនេះដែរ ត្រូវបានពន្យាពេលរហូតដល់ទៅ ៥ ថ្ងៃ ដោយសារតែអកាសធាតុមិនអំណោយផលដែលអាចនឹងប៉ះពាល់ដល់គ្រាប់កាំជ្រួច ដែលត្រូវបានផលិតឡើងឱ្យមានទម្ងន់ស្រាល ស្រោបដោយលោហៈផ្សំធាតុកាបូនពិសេសម្យ៉ាង។

នាយកប្រតិបត្តិក្រុមហ៊ុន Rocket Lab គឺលោក Peter Beck បានលើកឡើងក្នុងសន្ទរកថាមួយថា យើងគឺ​ឋិត​ក្នុងចំណោមក្រុមហ៊ុនមួយចំនួនដែលបានអភិវឌ្ឍកាំជ្រួចផលិតពីវត្ថុធាតុកាបូនពិសេសនេះ ហើយក្រុមការងាររបស់យើងបានចំណាយ ៤ ឆ្នាំ ដើម្បីផលិតវាឡើងដោយគ្មានការនឿយហត់។

លោកបន្ថែមថា Electron គឺជាកាំជ្រួចឯកជនដំបូងបង្អស់របស់ពិភពលោកដែលរួមគ្នាផលិតឡើងដោយក្រុមតូចមួយ ហើយគ្រប់យ៉ាងយើងអភិវឌ្ឍឡើងនៅក្នុងប្រទេសតែម្តង។

រ៉ូកែ្កត Electron ត្រូវបានរចនាឡើងសម្រាប់ដឹកជញ្ជូនផ្កាយរណបធនតូចដែលមានទម្ងន់ក្រោម ១៥០ គីឡូ​ក្រាម ទៅក្នុងគន្លងផែនដីជាន់ទាប ដើម្បីផ្តល់នូវសេវាកម្មអិុនធើណែតតម្លៃថោកសម្រាប់អ្នកប្រើប្រាស់ក្នុងប្រទេស។

នៅប៉ុន្មានសប្តាហ៍ខាងមុខ ក្រុម Rocket Lab នឹងចាប់ផ្តើមវិភាគទិន្នន័យដែលទទួលបានក្នុងអំឡុងពេល​ហោះហើរ ដើម្បីធ្វើឱ្យប្រសើរឡើងថែមទៀតទៅលើសមត្ថភាពរបស់ Electron។ ក្រុមហ៊ុនក៏គ្រោងផងដែរថា នឹងបាញ់បង្ហោះកាំជ្រួចប្រភេទនេះ រៀងរាល់ ៧២ ម៉ោងម្តង ឬ ៥០ ដងក្នុងមួយឆ្នាំ៕

#ItsaTest pic.twitter.com/KRo1iBB1wK

— Rocket Lab (@RocketLab) May 25, 2017

ប្រភពព័ត៌មានៈ cnet