នៅប៉ុន្មានថ្ងៃមុននេះ ក្រុមហ៊ុន Microsoft បានប្រកាសឱ្យដឹងថា Windows 10 កំណែថ្មី នឹងមានការផ្លាស់ប្តូរលក្ខណៈសម្បត្តិជាច្រើនផ្នែក ហើយវានឹងដាក់ចេញនៅពេលក្រោយនៅក្នុងឆ្នាំ ២០១៧ នេះ។ ក្នុងកំណែថ្មីដែលមានលេខកូដជំនាន់ 16215 នោះ វានឹងពាំនាំមកជាមួយលក្ខណៈសម្បត្តិថ្មីៗគួរឱ្យចាប់អារម្មណ៍ជាងគេចំនួន ៤ ដែល Post Tech សូមលើកយកមកបង្ហាញដោយសង្ខេបដូចខាងក្រោម៖

១– ផ្ទាំងផ្តល់ដំណឹង Notification

ផ្ទាំង Notification ថ្មី ត្រូវបានរចនាថ្មីឡើងវិញទាំងស្រុង ព្រមជាមួយការបែកចែកក្រឡោមព័ត៌មានសម្រាប់កម្មវិធីដាច់ដោយឡែកពីគ្នា។ វាពិតជាមើលទៅមានភាពទាក់ទាញ និងផ្តល់ភាពងាយស្រួលក្នុងការកត់សម្គាល់ខ្លាំងជាងមុន ដោយក្នុងនោះដែរ ឈ្មោះកម្មវិធី និងឈ្មោះឧបករណ៍ក៏ត្រូវបានរៀបចំដាក់ឱ្យនៅផ្សេងពីគ្នាទៀតផង។

២– Taskbar

ជាមួយរបារការងារឋិតនៅជួរខាងក្រោមនៃផ្ទាំង Windows 10 ថ្មី នឹងអនុញ្ញាតឱ្យលោកអ្នកដាក់ Link (តំណរភ្ជាប់) គេហទំព័រណាមួយដែលខ្លួនពេញចិត្ត ឬឧស្សាហ៍ចុចចូលប្រើញឹកញាប់ ប៉ុន្តែ វាអាចតភ្ជាប់បានតែជាមួយកម្មវិធី browser របស់ Microsoft ផ្ទាល់ប៉ុណ្ណោះ។ ក៏មានដែរការបង្កើនចលនាក្រាហ្វិកនៅលើ New Tab ក្នុងកម្មវិធី Edge នេះ ដែលជួយឱ្យវាដំណើរការកាន់តែលឿនជាងមុនបន្តិច។

៣– Cortana

លោកអ្នកនឹងឃើញការផ្លាស់ប្តូរមួយចំនួន ជាមួយសមត្ថភាពក្រើនរំឭកដោយការស្កេនលើរូបភាព។ ឧទាហរណ៍ បើលោកអ្នកបានថតរូប Poster មួយ Cortana នឹងកត់ចំណាំវាចូលក្នុងកម្មវិធី Calendar ដើម្បីទុកធ្វើការក្រើនរំឭកនៅពេលវេលាណាមួយ។ ជំនួយការសំឡេងឌីជីថលនេះ ក៏មានភ្ជាប់មកជាមួយឧបករណ៍ថ្មីឈ្មោះ Lasso សម្រាប់ប្រើជាមួយប៊ិកវៃឆ្លាត ដោយលោកអ្នកគ្រាន់តែគូសជារង្វង់លើរូបភាពអ្វីមួយ វានឹងកត់ត្រាជាព្រឹត្តិការណ៍ចូលទៅក្នុងកម្មវិធី Calendar ដើម្បីក្រើនរំឭកលោកអ្នកតែម្តង។

៤– ផ្តោតលើការប្រើប៊ិកចុចបញ្ជា

Windows 10 កំណែថ្មីនេះ ត្រូវបានផ្តោតសំខាន់ខ្លាំងទៅលើមុខងារគាំទ្រការប្រើប្រាស់ជាមួយប៊ិក។ ផ្ទាំងកម្មវិធីសម្រាប់ប្រើប៊ិកគូសវាស់ផ្តល់នូវមុខងារ ឬឧបករណ៍សម្រាប់សរសេរ កែកុន និងបន្ថែមរូបកូនតុក្កតា emojo កាន់តែច្រើន និងកាន់តែសម្បូរបែប ហើយវាអាចចាប់សម្គាល់ដឹងទម្រង់នៃការសរសេរដៃ និងអាចបំប្លែងវាឱ្យទៅជាទម្រង់អត្តបទសរសេរដោយកុំព្យូទ័រ ហើយក៏អាចប្រើប៊ិកកាត់ លុប និងជ្រើសរើសអត្តបទដើម្បីកែតម្រូវជាដើម។ល៕ប្រភពព័ត៌មានៈ theverge